ALCOA aktiaatileqatigiiffiillu toqqissisimanartinneqanngillat

Inatsisartunut ilaasortap, Anthon Frederiksenip naalakkersuisut siunertavimminnik isertuussiniartutut oqaatigai, Nukissiorfiillu aktieselskabinngortinnerisigut aluminiumik aatsitsivittaariniakkap akilersinniarneqarnera ilimagaa. ALCOA-mut tunngasut Nukissiorfinnillu piginnittuunerup qanoq isikkoqarnissaata imminnut sunniuteqartinnaveersaarnissaat eqqumaffigineqartariaqartoq Anthon Frederiksen oqarpoq – Nangillunilu; pilersinniakkat aktieselskabitut piginneqataaffigineqalersut misillerfigereernikooqaagut. Anthon Frederiksen ALCOA-p pilersaarutigineqarneranut Nukissiorfiillu aktieselskabinngotinnissaanut akerliusoq oqarpoq. Demokraatit siulittasuat, Jens B. Frederiksen oqarpoq ALCOA-mut atatillugu pilersaarutinut Nukissiorfiillu aktieselskabinngortinnissaannut akerliunerminut, Nukissiorfiit A/S-inngoreerluni akiliisinnaajunnaassagaluarpat atuisartut qanoq sillimmaserneqarnerisa qulakkeerneqannginnerat pissutigigini. Inuit Ataqatigiit aamma Nukissiorfinnut ALCOA-mullu tunngasut qaqilerneqaqquaat, inatsisartunut ilaasortap, Esmar Bergstrømip Naalakkersuisut assigiinngitsunik apeqquteqarfigai;Siullertut; Kalaallit Nunaanni aktiaatileqatigiiffiit qanoq maannakkorpiaq akiitsoqarnersut, akiitsorineqartunillu aningaasat qanoq amerlatigisut nalingannik Namminersornerullutik Oqartussat qularnaveeqqusiisimanersut.