Alberto Gonzales isornartorsiorneqaleraluttuinnarpoq
USA-mi republikanerit inatsisinik atortitsinermut ministeriutitaat Alberto Gonzales isornartorsiorneqalerattuinnarpoq. Demokratit isumaqarput ministerip atorfini atornerlullugu naalagaaffiup eqqartuussissuserisui arlallit soraarsissimagai.
Præsidentip illorsuanit Det Hvide Hus-imit aamma Inatsisinik Atortitsinermut ministereqarfimmit eqqartuussissuserisunik arfineq-pingasunik soraarsitsineq pisarneq malillugu ingerlatsinertut taaniarneqaraluarpoq. Tamannali pisuutitsinernik naalakkersuinikkullu pissaanermik atornerluinertut isiginiarneqarpoq.
- Naalagaaffik ingerlaqqissappat, inatsisinik atortitsinermut ministeri Alberto Gonzales tunuartariaqarpoq, Demokratit inatsisartunut ilaasortaatitaat Chuck Shuma oqarpoq.
Demokratit isumaqarput eqqartuussissuserisut arfineq-pingasut soraarsinneqarsimasut republikanerit isumaat aamma præsidentip illorsua Det Hvide Hus naalakkumannginnamikku.
Inatsisinik atortitsinermut ministerip Gonzalesip soraarsitsineq ippassaq aalajangiusimavaa.
- Piumasarineqartunik naammassinnissinnaanngillat præsidentillu allaffeqarfissuarmi kikkut soraarsissanerlugit nammineerluni aalajangersinnaavaa, Alberto Gonzales oqarpoq.
- Taama pissusilersornerup eqqartuussissuserisoqarneq tamaat sajuppillatsippaa, Demokratit inatsisartuni ilaasortaatitaat Shuma ippassaq taama oqarpoq.
Demokratit isumaqarput Buship allaffeqarfissua naalakkersuinikkut akerlilersortiminik soraarsitsiortortoq taamalu eqqartuussissuserisoqarnerup tatiginassusia kiffaanngissuseqarneralu tatiginarunnaarsikkaa.
