Alaskap nunap inoqqaavisa oqaasii siuarsaavigissagai
Alaskap guvernøriata, Bill Walkerip Alaskami nunap inoqqaavisa oqaasii suli atorneqartut 20-t annaanniarsarinialerpai.
Taamaammat oqaatsit taakku naggueqatigiillu Inuppiaat yupillu oqaasii marluk ilanngullugit atatinniarnissaannut siuarsarnissaanillu nalunaaruteqarpoq.
Ilinniartitaanermut pisortaqarfiup nunap inoqqaavisa oqaasii atuarfinni siuarsaavigissagai, nalunaarummi sapaatip akunnerani matumani atsiugaanni allassimavoq.
Tamatuma saniatigut Alaskap pisarneq malillugu nunat aqqi maannamit atulissavai.
Guvernørip nalunaarutaa Alaskami Oqaatsit pillugit Ataatsimiititaliarsuup, Alaska Native Language Councilip nalunaarutaa tunngavigalugu suliarineqarpoq, tassani oqaatsinit 20-nit arlariit atorneerunneqarnissaminnut aarlerinartorsiortut allassimavoq.
Naalagaaffik naalakkersuisullu oqaatsinik atuisoqannginnerulerneranut pisooqataasimasut Bill Walkerip atsiornermini nassuerutigaa.
Kisianni, siumut isigaluni nunap inoqqaavisa oqaasiisa naleqassusaannik pilersitseqqittoqarnissaanut piffissanngortoq, Associated Pressimut oqarpoq.