Alaskamiut filmiliaat Inuppiatut oqaasertalik
Filmi taaguuteqarpoq “Sikumi” – ilitsersuisuuvoq Andrew Okpeaha MacLean, Alaskami Fairbanksimi aamma Oqqiarfimmi, tassa Barrowimi Amerikamiumik ataataqarluni naggueqatigiinnillu Inunneersumik anaanaqarluni peroriartorsimasoq.
- Eqqaamavara Inuppiaat oqaasiinik oqalussinnaanissara anaanama pingaartittorujussuugaa, kisianni uagut kingulliarsuit tuluit oqaasiinit tiguartisimasorujussuuvugut, tassami oqaatsit taakkua tv-mi filminilu kisimik atugaapput, Andrew Okpeaha MacLean atuagassiamut filminik sammisaqartartumut “Backstage”-mut oqarpoq.
Andrew Washingtonimi isiginnaartitsisartutut ilinniagaqaqareerami Barrowimut uterpoq, Alaskamilu isiginnaartitsisartut ullutsinneersut siulliit aallartillugit, tamatumunngalu peqatigitillugu Inuppiaat oqaasiinik ilitsoqqussarisaminik ilinniaqqilluni.
Maannalu tassa Alaskamiut Inuppiaat oqaasii atorlugit filmiliamik saqqummersitseqqaartuuvoq – oqaluttuarlu “issittormiut koorpulersaarutaannik” taallugu. Filmi Alaskami qeriuaannartup masarsuttaani 20-nik issittumi nannut avatangiiseralugit filmiliarineqarpoq.