Alaskami uuliasioqatigiiffiup, BP-p, oqartussat avatangiisinillu illersuiniaqatigiiffiit kisiisa ajornartorsiutiginngilai. Uuliasioqatigiiffiup piginnittui aamma maanna ajornartorsiortitsilerput.
Alaskami uuliap aqqutai manngertornillit atorneqartarsimammata, piginneqataasut arlallit sapaatip-akunnerani uani eqqartuussivimmut tunniussisimasut, nutaarsiassaqartitsivik Reuters tusarliussivoq.
BP-p millionerpassuarnik akiliisitaanissaa piginneqataasut annilaanngatigaat. BP-p kukkunerata kingunerisaanik namminneq piginneqataassutimik nalikilleriarnissaat akuererusunngilaat.
BP-ip ajornartorsiornera ukioq manna malunnarsivippoq. Uuliap aqqutaa putulik erngarmat uulia sukuluiarneqanngitsoq pinngortitamut kuuppoq. Uuliap aqqutai arlallit tamatuma kingorna manngertornersimasut paasineqarput.
Suut tamarmik ajorteruttormata BP-ip Alaskami uuliamik tunisassiornera aggustip qaammataani unitsinneqarpoq.