Alaskami tuttorsuit ajornartorsiorput

Alaskami qaqqani apersuarnera tuttorsuarnik ajornartorsiortitsivoq. Aput maakkarnangaarmat tuttorsuit inoqarfinnut pisalerput.

Alaskami Anchorage-imi persersorsuusaqattaarnerata kingunerisaanik, aput pisarnermit portunerungaartoq nakkaasimavoq, uumasorsuit, tonsip affaanik oqimaatsigisut, aqqusinernut avalassaartalerneranik kinguneqartumik, atuagassiaq ilisimatuussutsimut tunngasunik imaqartoq, Examiner, nittartakkamini taama allaaserinnippoq.

Bioloogi Rick Sinnot oqarpoq, tuttorsuit taama oqimaatsigisut apussuup nerisassaqarnannginnera pissutigalugu inoqarfinnut pisalernerat tupiginngikkini.

Ilisimatoorlu alla, aamma oqarpoq, tuttorsuit arlallit biilinut aportillutik ajunaareersut.

Tuttorsuit aqqusinerni ingerlaartillutik ajunaartartut nalinginnaasumik ukiumut 130-usarput, ukiormannali kisitsisip marloriaatinngunngikkuni pingasoriaatinngornissaa ilimagineqarpoq. Perlerlutik aamma toqorarnissaat aarleqqutigineqarpoq. Tuttorsuup ataatsip ullormut naasut 20 kiilut missaanniittut iisarai.

Tuttorsuit illoqannginnersani toqusut naalagaaffiup pisarpai, inoqarfinnili toqusut nunaammik piginnittup pisarlugit.