Alaskami qaqqaq innermik anitseqqajaavoq
Qaqqanik innermik anitsisartunik alapernaarsuiffik, Alaska Vulkanobservatorium, inuppassuarnit saaffigineqaqattaarpoq, innuttaasummi paaserusulluinnarpaat qaqqaq qaqugu innermik anitsissanersoq. Aviisimi Politikenimi tamanna atuarneqarsinnaavoq.
Mount Redoubt, illoqarfissuarmit Anchoragemit kujammut kimmut 180 kilomerit missaannik ungasitsigisumiittoq, sapaatip-akunneri kingulliit marluk anitseqqajaaginnaavippoq.
Qaqqanik innermik anitsisartunik paasisimasaqarluartut akissutigisinnaasaat tassaaginnarpoq, qaqqaq innermik anitsiliivikkunartoq, anitsigunilu Alaskap Kujataata qeqqa tikillugu arsakuliornissaa naatsorsuutigigitsik.
Alaskami qaqqanik anitsisartunik alapernaarsuiffimmiit nalunaarutigineqarpoq, qaqqaq ullut arlalialunnguit, immaqaluunniit sapaatip-akunnialunngui, qaangiuppata anitsisinnaasoq.
Saaffiginnissutit suulluunnit alapernaarsuiffimmit tigoorarneqarput, innuttaasullu ilaannit saaffiginnissutinut eqqumiitsunut, oqarasuaatikkut nammineerluni akisartumut immiunneqarsimasunut, ilaagujoq una: innuttaasut ilaat Hawaii-iliarnissaminunngooq bilitsisigami qulakkeerusukkaa, qaqqap innermik anitsinera pissutigalugu timmisartornissani taamaatiinnarneqassanngitsoq:
- Isumagilaarsinnaavisiuk qaqqap ullaakkut nalunaaqutaq arfineq-pingasut kingorna aatsaat anitsinissaa, paasiniaasoq kimigiiserpoq.
