Alaskami naggueqativut uuliasioqatigiiffimmut ajugaapput
Uuliasioqatigiiffissuup uuliasiornissaminut akuersissutaa eqqartuussutip atorunnaarsippaa, pissutaatinneqarporlu uuliasiortoqalissagaluarpat mingutsitsineq qanoq annertutigissanersoq, taavalu qillerineq arfernut qanoq ajoqutaatigissanersoq, USA-mi naalagaaffimmi pissutsinut ministereqarfiup sukumiisumik misissorsimanngimmagu.
Shell aqqaneq-marloriarluni qillerinissaminut oqartussaasunit februaarimi akuerisaagaluarpoq, kisianni tassa Alaskami Arfanniartarneq pillugu Ataatsimiititaliarsuup, The Alaska Eskimo Whaling Commissionip, tamanna eqqartuussisunut suliassanngortippaa, maannalu tassa ajugaalluni.
- Eqqartuussut oqartussaasunut kalerrisaarineruvoq Shellip qillerinissamut pilersaarutai pipallanneruvallaarlutillu peqqissaarutaanngippallaartut, Arfanniartarneq pillugu Ataatsimiititaliarsuarmeersoq, Charles Clusen, oqarpoq.
- Alaskap sineriaata avataani uuliasiornissaq peqqissaarnerusumik akisussaassuseqarnerusumillu ingerlanneqartariaqassasoq USA-mi præsidentinngortussap, Barack Obamap, naalakkersuisussaasa anguniartariaqassagaat eqqartuussutip inernerata ersersippaa, Alaskami pinngortitap Issittumilu pisuussutit uumassusillit ajoquserneqannginnissaat pisariaqarmat, Charles Clusen aviisimit Herald Tribunimit apersorneqartilluni oqarpoq.