Alaskami aamma Canadap issittortaata kippasissuani tuttut ikilisimapput. Canadap issittortaata kippasissuani aamma Alaskap avannaani, tuttut ingerlaartut timmisartumik assiliortorneqarsimanerisa kingorna nalilersueqqinnerimi, Alaskami uumasunik nujuartanik ilisimatuut nalunaarusiaminni saqqummeqqammersumi allaaseraat, tuttut ilimagisamik ikinneruneri. Siorna ukiakkut nalunaarutigineqaraluarpoq tuttut 400.000-iusut amerliartorneralugillu taamani nalunaarusiarineqarlutik. Timmisartumik taamani assilisat maanna kiseqqissaarneranni paasinarsivoq tuttut 350.000-iinnaasut, tassalu ilimagisamik 50.000-inik ikinnerusut. - Tuttut ikilisimasut maanna ilisimalereeraluarlutigit oqarsinnaavugut peqqissuusut nukittorpasittullu, Uumasunik nujuartanik ilisimatooq, Jim Dau aviisimut Bristol Bay Timers-imut oqarpoq, nangillunilu: - Tuttut ikilisimagaluartut naatsorsuutiginngilarput piniagaanerisa killilersorneqarneri aammaarlugu eqqartorneqaqqittariaqarnera, Jim Dau oqarpoq. 1975-imi tuttut 75.000-iinnanngoraluarput, 2003-illu tungaanut amerliartoramik 500.000-it missaaniilerlutik. Maannalu tuttut arriitsumik ikiliartoqqilerput. - Arriitsumik ikiliartorneri tassanngaannaq ikilerujussuarnerannut sanilliullugu pitsaaneruvoq, Jim Dau aviisimut Bristol Bay Times-imut oqarpoq.
