Alapernaarsuisussaqartillugu Maersk isertorsinnaajunnaarpoq
Taamaaliornermikkut uuliasiorfinni sulisut periarfissinneqartarsimapput paasiniaasut uuliasiorfinnut apuutinnginneranni uulia imaanut maqisoq unitsissallugu , taama allappoq aviisi Politiken, Mærskikkut iluminni qarasaasiat atorlugit allagaat pissasiarinerisa kingorna.
- Timmisartut alapernaarsuileraagata, Mærskikkut torersaapallattussaanngillat. Taamaaliortarsimanerat akuerineqarsinnaanngilaq, taamaattumik piaarnerpaamik Mærskikkut ataatsimeeqatiseraagut, Avatangiisit pillugit Qullersaqarfimmi pisortap tullia, Michael Schilling aviisimut Politikenimut oqarpoq.
Taama uparuarneqarnertik pillugu Mærskikkut erngerlutik Danmarks Radio-mut ima oqarput:
- Alapernaarsuisoqarniartillugu paasissutissat kikkunnit tamanit atorneqarsinnaanngitsut paasigatsigu, tamanna erngerluta unitsipparput, Uuliasioqatigiiffiup Mærskip pisortaanera, Jakob Thomassen DR-imut oqarpoq.
Sapaatip akunnialui qaangiupput, uuliasioqatigiiffik Mærsk nunatta sineriaani uuliasiortussatut akuerisaammat. Ukiut tallimat missaat qaangiuppata misiliillutik qillerilersinnaallutik taakku oqarput.
Uuliasioqatigiiffik Mærsk ukiuni kingullerni tallimani Nordsømi uuliasiornerminni, 92-erilarlutik isumannaallisaanermik aamma avatangiisit pillugit inatsisinik unioqqutitsisarsimapput.