Akuunerulersitsinissaq anguniarlugu isumasioqatigiilerput

Oqaatsitigut akuunerulersitsinissaq pillugu suleqatigiisitamik pilersitsisoqarmat, oqaasiliortut piumaffigineqarput inuiaqatigiinni oqaatsitigut akuunerulersitsinissaq pillugu inatsisiliornissamut innersuussutissaq suliarineqassasoq. Taamaammat akuunerulersitsinissamut suleqatigiit Januaarip naanerani isumasioqatigiisitsilerput. Suliffeqarfiit kattuffiillu isumasioqatigiisitsinissamut peqataassapput. Oqaatsitsigullu akuunerulersitsinissaq pillugu suleqatigiinni ilaasortaq Ellen Karlsen ima oqarpoq:

- Nalunaarsuinissatsinnut taakkua atortussaavagut. Pingaaruteqarpoq inuiaqatigiinni oqaatsitigut akuunerulersitsinissami inuiaqatigiit aamma tusarniassallugit. Uagut suleqatigiissitami kisitta isumarput tusarneqarani inuiaqatigiit isumaat aamma tusarusupparput. Oqaatsitigut akuunerulersitsinissami kalaallit danskit allatullu oqaasilli tamarmik pineqarput, Ellen Karlsen oqarpoq nangillunilu: - Tamarmik ilaatinneqarnissaat pingaaruteqarpoq, tassami nunatsinni kalaallisut oqaatsigut patajaatsumik atorneqarnissaa aammalu oqaatsinik allanik atuisinnaanerup siunertarineqarnissaa anguniarneqarmat. Isumasioqatigiinnissami tamakkua eqartorneqassapput. Nunarsuarmioqataavugut, kalaallit oqaasii kisiisa pinnagit oqaatsilli aamma allat atorsinnaaneri nukittorsartariaqarpoq. Illuatungaanilu aamma kalaallisut oqaatsitta allamiunit atorneqarsinnaalernissaa pingaaruteqarpoq.

Akuunerulersitsinissami suleqatigiinni ilaasortaq Ellen Karlsen taama oqarpoq.

Akuunerulersitsinissaq pillugu inatsisissamut innersuussutissaq ukioq manna martsip qaammataani naammassineqarsimassaaq.