Akunneq apeqquteqartarfik isornartorsiorneqarpoq
- Naluara atornerlunneqarnersoq. Kisianni immaqa oqartoqarsinnaavoq, apeqqarissaarnissamut siunertaq eqquinneqarani atorneqartarpoq, Demokraatit politikikkut oqaaseqartartuat Niels Thomsen oqarpoq. Tassalu siunertaq uniorlugu akunneq apeqquteqartarfik, Niels Thomsenip isumaa malillugu atorneqartarmat, ilaanni najuunneq ajorpoq:
- Maluginiarpara, politikerit ataasiakkaat isummaminnik annissuinissamut piffissaq annertooq atortaraat, siunertaviugaluartoq, apersorneq oqaloqatiginnerlu, uniorneqartarluni.
Siumumi aamma akunneq apeqquteqartarfik naammagineqanngilaq. Tassanngaannilli isornartorsiut allaaneruvoq, piffissakippallaarneq Inatsisartuni ilaasortaq, Hans Enoksen, isumaqarmat.
- Oqaloqatigiittussaavugut. Pitsaanerpaamik immaqa aporaassutit pivallaanngikkaluarlugit naapinniarsinnaanerput mattunneqarpoq, piffissaq apeqquteqarfissarput sivikimmat. Paarlattuanik politikimut allaat ilaatigut oqaatsit tusarnerpallaanngitasut atorlugit apuussisariaqartarpugut, Hans Enoksen oqarpoq. Aaqqiissutissatullu siunnersuutigalugu, Akunneq apeqquteqartarfimmi naalakkersuisunut ilaasortaq ataaseq nalunaaquttap akunnerani ataatsimi piffisaqartinneqassasoq. Akunneq apequteqartarfik mannakkut naalakkersuisunut ilnaasortanit marlunnit avinneqartartoq
Kisianni akunneq apeqquteqartarfiup maanna atorneqarnera Inatsisartut siulittaasuata naammagisimaarpaa:
- Inatsisartut periarfissinneqarnerat Siulittaasoqarfimmi naammagisimaarparput, Josef Motzfeldt taama oqarpoq.
Aammali akunneq apeqquteqartarfik siunertamisoqissaaq tamatigut atoneqarneq ajornerarlugu isornartorsiuisut passilluarsinnaavai. Taamaammat:
- Apeqquteqartup imaluunnit oqaaseqartup naammassineratigut ilasortanut eqqaasititsissutigisinnaavarput, una apeqqarissaarnissamik siunertaqartoq.
Tassalu Inatsisartuni ilaasortat ataatsimiittarfimmi periaatsimik nutaami sungiussinissaminnut periarfissaqartariaqatut, siulittaasoq isumaqarpoq.
Kisianni tassa akunneq apequteqartarfik siunertamisut atorneqarnersoq Siulittaasoqarfimmi nalilersorneqartuartoq, Josef Motzfeldt oqarpoq.
- Ilusaa, sivisussusaa aamma naalakkersuisut apeqqarissaarfigineqartussat amerlassusaat Siulittaasoqarfimmi nalileeqqissagutta tikinngitsuussanngilagut, Josef Motzfeldt oqarpoq.
Ullumi akunneq Apeqquteqartarfimmi pisarnertut Naalakkersuisuni ilaasortat marluk apeqqarissaarfigineqarput, ullumilu tassa Mimi Karlsen aamma Ane Hansen tulleriillutik oqaluttarfimmiipput.
