Akunnaami eqqaavissuaq innuttaasunut tipimiutitsisoq
Kommunimiit oqaatigineqarpoq, tunisassiorfiup sivisuumik matoqqasimanera peqqutaalluni eqqaaviup nuunneqarnissaa aningaasassaqartinneqanngitsoq.
Grete Olsen oqaluttuarpoq nunaqarfiup eqqaavia, anartarfiit puuinut eqqaaviuutigisoq, angerlarsimaffimminiit 100 meteri ataallugu ungasissusilimmi inissisimasoq.
- Niviugappassuit igalaakkut isaasarput, saliinartorujuullunilu, Grete Olsen oqaluttuarpoq.
Nunaqarfimmiut atsiortiterlutik Aasiaat Kommunianut naammagittaalliortarsimagaluarput, kisianni sunniuteqanngitsumik.
Aasiaat kommunalbestyrelseata sanaartornermut avatangiisinullu ataatsimiisitaliaani siulittasoq, Aqqaluk Petersen ima oqarpoq:
- Eqqaaviup nuunneqarnissaa kissaataavoq, kisianni naluneqanngilaq Aasiaat Kommuneat suliffissaaleqinermik eqqugaanikuusoq, ingammik aalisakkeriviup matoqqasimanera pissutaalluni. Kommunalbestyrelsimi siunniunneqarnikuuvoq innuttaasunut sullissineq appariassanngitsoq, taamaattumik sipaarniarneq anguniarlugu sanaartornermut tunngasut aallerfigineqarput, Aqqaluk Petersen oqarpoq.
