Aktiat nalingi qaffariassangatinneqarput
Taamatut neriunartumik inissisimasoqalerpoq nunat EU-mut ilaasortat, euromik aningaasallit, EU-mi aningaaserivinnik ingerlanerliortunik annaassiniarniarlutik ippassaq neriorsuereersullu. Frankrigip præsidentiata Nicholas Zakozyp aningaaserivinnik annaassiniarluni iliuusissatut ippassaq unnukkut saqqummiussaani milliardit koruunit qassit pineqarnersut maanna nunarsuarmiut tusassallugu utaqqivaat.
- Aningaasarsiornikkut ajornartorsiornermi annaassiniarluni iliuusissat tamarmik pilersaarummi matumani ilaapput, Frankrigip præsidentiata Nicholas Zarkozyp nunat EU-mi ilaasortat euromik aningaasallit sinnerlugit EU-mi aningaaserivinnut annaassiniarluni iliuusissaq oqaluttuarisaanermi aatsaat taamak aningaasanik naleqartigisoq saqqummiukkamiuk ippassaq taama oqarpoq.
Ullaap tungaani Europami pappilissanik nalilinnik niuerfiit annersaanni pappilissat nalillit nalingi qaffariarput, naak sapaatip-akunnerani kingullermi ullaat tamaasa appariarnerat takuneqarsinnaasaraluartoq.
Pappilissanik nalilinnik niuerfiit Parisimi, Londonimi Berlinimilu 6 procentimiit 8 procentimut ullaaq qaffariarsimapput.
Aningaaserivissuit euromik ingerlatsisut arlaannaataluunniit akiliisinnaajunnaarluni uninnginnissaa, aningaaserivinnik annaassiniarluni iliuuseqarnermi siunertaavoq.
Tamatuma peqatigisaanik nunat euromik aningaasallit aningaaserivimminnut milliarderpassuarnik qularnaveeqqusiipput, aningaaseriviit taamaalillutik aningaasanik tigoriaannarnik imminnut atukkeqqissinnaalerniassammata. Aningaasarsiornikkut ajornartorsiornermi aningaaseriviit aningaasanik tigoriaannarnik imminnut atukkerumajunnaaraluarnerat ajornartorsiutaagaluarpoq.
Annaassiniarluni iliuusissami aningaasat qasserpiaat atorneqassanersut ullumikkut ilisimanngilarput. Nunat euromik aningaasallit qanoq atsigisumik aningaaserivinnik annaassiniarlutik aningaasaliisimanersut ullumikkut paasinarsissaaq.
Tysklandimi tusagassiorfinnit oqaatigineqarpoq, Tysklandiinnarmi 3.000 milliardit koruunit aningaaserivinnik annaassiniarnermut atorniarneqarput.
