Aktianik nioqquteqarunnaarallarneq sivitsoqqippoq
- Inerniliussassat pillugit suliffeqarfiup Kalaallit Nunaanni naalakkersuisut oqaloqatigisarsimavai, naalakkersuisullu qanoq aalajangernertik sapaatip akunnerata uuma ingerlanerani nalunaarutigissavaat, GME-mi pisortaq, Roderick McIllree, nalunaarummi, Australiami børsimi, tamanut ippassaq saqqummiunneqartumi, allappoq.
Kalaallit Nunaanni naalakkersuisut nalunaaruteqarnissaasa tungaannut pappialanik nalilinnik nioqquteqaqqusinnginneq atuutiinnarallassaaq, Roderick McIllree ilisimatitsivoq.
Suliffeqarfiup aktiaataanik nioqquteqarunnaarallarnissaq GME-ip aggustip ulluisa aappaanni nammineq aalajangerpaa. Tamanna pivoq aatsitassarsiornissamut akuersaannginnertik Naalakkersuisut aalajangiusimaannassallugu aalajangermatali.
Aatsitassarsiornissami uranisiornissaq aamma ilaavoq. Narsap eqqaani Kuannersuarni uranisiornissamik GME-p pilersaarutaa tassani pineqarpoq.
Aktianik nioqquteqarunnaarallarneq, aggustip ulluisa aappaanni aallartittoq, GME-p siullermik aggustip ulluisa aqqaneq-aappaanni sivitsorpaa, Namminersorlutik Oqartussat aallartitaannik suliffeqarfiup suli oqaloqateqarnera pissutaanerarlugu.
Greenland Minerals and Energyp Nunatsinni immikkoortortaani siulersuisunut ilaasortat Københavnimi sisamanngorpat ataatsimiissapput. Ataatsimiinneq pitinnagu aaqqiisoqarsimanissaa taassuma siulittaasuata, Lars-Emil Johansenip, neriuutigigaa, sermitsiaq.ag-mi allaaserineqarpoq.
