Akorngusersuineq sivisusinnaavoq
- Anguniakkat ilaat ima pingaaruteqarsinnaasarput allaat inatsisinik unioqqutitsinissaq pisariaqarsinnaasarluni, Jon Burgwald Greenpeacep angallataaneersoq KNR-imut oqarpoq.
Cairn Energyp qillerinera unitsinniarlugu akorngusersuineq piviusunngortinneqartoq, Greenpeacemit oqaatigineqarpoq.
- Cairn Energyp qillerinini sikunnginnerani naammassiniartussavaa, taamaattumik qillerineq sapinngisarmik kinguarsarniarlugu taamatut iliuuseqarpugut, Jon Burgwald oqarpoq.
Qillerivimmik akorngusersuisut sisamat toqqinik nerisassanillu ullunut arlalinnut naammattunik nassataqartut, Jon Burgwaldip oqaatigaa.
- Mexicop kangerliumarngani uuliakoorneq avatangiisinut qanoq kingunerlutsitsisinnaasoq takoreerparput, issittumi taamatut pisoqassagaluarpat tamanna ajornerujussuarmik kinguneqartussaassaaq, Jon Burgwald oqarpoq.
