Akiuussutissamik kapitinnerup kingunipilugisinnaasai ingasaanneqarput
Kapitinnerup kingorna immersuisoqartarpoq, arlannik malugisaqarsimagunik tamakku nalunaarsussallugit. Immersukkat Nakorsaatit pillugit Qitiusoqarfimmut nassiunneqartarput, tassanilu sulisoq, Inge Mortensen, naammagittaalliuummik ataasinnguamilluunniit suli tusagaqanngilaq.
Norgimi oqartussaasut sunniuteqarnerlutsitsisunit hornorujunit amerlanernik sapaatip akunnerani kingullermi tigusaqarsimapput. Sunniutit tassaanerusimallutik sinissaarunnerit, inalukkatigut ajornartorsiuteqarnerit, qilusoortarnerit ajornerpaagaangallu ilisimajunnaarnerit.
Kapitereernerup kingorna sunniutaasinnaasut maluginiarneqarluarnissaat Nunatsinni nakorsaanerup Flemming Stenzip pingaaruteqarnerarpaa. - Sunniutilli taama sakkortutigippata naartusut kapitinnissaat kaammattuutigerusunngilara, oqarpoq. Tasiilami niviarsiarannguaq H1N1-imik tunillatsissimasoq pingasunngormat nalunaarutigineqarpoq, Nunatsinni siulleq. Allanik suli tunillatsittoqanngitsoq, Flemming Stenz ilisimatitsivoq.
