Akiuussuseeqqusineq paatsoorlugu kommunip qitsuit pingasut toquppai
Kim Byronip Christian Haldillu qitsuutitik pingasut akiuussusertinniarlugit Qeqqata Kommunianut oktobarip pingajuani tunniukkamikkit annaavaat.
Qitsuit peqqissut pingasut perlerornermut akiuussuserneqaratik Maniitsumi eqqaavissualiaanneqarput kommunimilu sulisunit aallaaneqarlutik toqunneqarput ikuallanneqarlutillu.
Qanoq ililluni taama ajortigisumik pisoqarsinnaanersoq aappariit paasisinnaanngilluinnarpaat, kommunimiillu pisoq ’ajuusaarnartorujussuartut’ isigineqarpoq attaveqaqatigiinnikkullu kukkusoqarsimaneranik pissuteqartinneqarluni.
Kommunip kukkuneq nassuerutigaa
Uumasut nakorsaata aappariillu akornanni e-mailikkut attaveqaqatigiinneq KNR-imit takuarput. Tassani allassimavoq qanoq pisoqarsimanera uumasut nakorsaanit akissutissarsineqarsimasoq.
"Kommunip nassuiaatimini uannut ilisimatitsissutigaa qitsuutissinnik toqutsineq attaveqaqatigiinnikkut kukkusoqarneratigut pisimasoq. Sulisoq qitsunnik akiuussutissamik kapisisussaq, kalaallisut oqaaseqartoq, danskisut allassimasumik suliakkinneqarsimavoq. Suliassaq paatsoorsimavaa, kukkunerlu pisimalluni. Sulisup qimminut qitsunnullu akiuussutissanik kapisisinnaanermut Uumasunut Nakorsaqarfimmit Inuussutissalerinermullu Oqartussaaffimmit akuersissuteqarneranik uppernarsaat kommunimit aamma nassiunneqarsimavoq.
Kommunip nassuiaataa tunngavigalugu suliaq uatsinni matussallugu aalajangerpunga", uumasut nakorsaat allappoq.
Pisup kingorna Qeqqata Kommuniani Teknikkimut Avatangiisinullu pisortaq, Ulrik Lyberth, aappariinnut mailikkut allalluni kukkunerminnik nassueruteqarpoq, tamannalu KNR-imit takuarput.
"Kukkunermut akisussaaffik tamarmi uanniippoq. Immikkoortortami sulisut suliassaminnik suugaluartunik paasinnilluarnissaasa qulakkeernissaa uanga akisussaaffigaara, ajoraluartumillu pisumi uani sullarliorpugut".
Assingusumik pisoqaqqinnginnissaanut kommuni marlunnik iliuuseqarsimavoq. Sulisut immersugassamik immersuisalissapput suliassap suunera apeqqutaatillugu. Ataaseq akiuussutissamik kapisineruppat ataaserlu toqutsineruppat. Immersugassat taakku marluk kalaallisut danskisullu allaqqapput.
"Sulisut attuumassuteqartut tamarmik erseqqissaaffigeqqissaarneqarput qanoq ittunik suliakkinneqarnertik qulakkeertassagaat aallartitsinnatillu suliassap suuneranik tamakkiisumik paasinnissimanertik qulakkeertassallugu."
Kommunip suliaq KNR-imut oqaaseqarfigiumanngilaa aaqqissuisoqarfimmullu e-mailimi allappoq:
”Pisoq ataasiinnaq pineqarpoq aalajangersimalluinnartoq, taamaammat pineqartut peqatigalugit suliap isumaginissaa naleqqunnerutipparput.”
Qitsulli arnaviaq Soksen qitsuillu angutivissat marluk Tærte aamma Sigurd aappariit takoqqinnavianngilaat.
- Paasisinnaanngilarput qanoq ililluni taamaaliortoqarsinnaanersoq. Paasisinnaanngivippara, Kim Byron oqarpoq.
Avissaaqqaneq
Aappariit massakkut avissaaqqapput. Pisoq paasisinnaannginnamikku kisiannili aamma timikkut.
Kim Byron Danmarkimut nuuppoq suliffittaamini oktobarimi aallartittussaagami, Christian Haldili suli Maniitsumiilluni.
Kommunili aappariinnik oqaloqateqarusukkaliuarpoq, kommunimit oqaatigineqartoq naapertorlugu ’sulisumut pineqartumut ajuusaarnarsimaqimmat’. Aappariinnut allaat taarsiinissamik neqerooruteqarpoq, Kim Byronili qularluni.
- Iluaqutaanavianngilaq, qitsuup inuunera qanoq taarserneqarsinnaagami?
- Toqutsinertut isigaara. Nalunngikkaluarpara uumasut inuunerat inuit inuunerannut samnillersuunneqarsinnaanngitsoq, kisianni suliakkiiummik qulakkeerinneqqaarani taama aalajangerneq paasisinnaanngilara, Kim Byron oqarpoq.
- Sisamanik qitsuuteqaraluarpugut, ataasiinnarli kiserngoruppoq, qitsuit sisamaat Røvlund siniffiup ataanut qujanartumik toqqorsimammat Christiaallu qitsuit aaneqarmata aggertissinnaasimanngimmagu.
- Ilanngullugu (Kommunimit, aaqq) tiguneqarsimagaluarpat susoqarsimassagaluarnersoq eqqarsaatigisinnaanngilara, Kim Byron atortisimarpaloqaluni oqaluttuarpoq.
- Qitsuutigut qitornatut isigaagut. Ilaqutariiulluta tassaavugut Kim, Christian qitsuillu, Kim Byron qiannissarluni oqarpoq.
Danmarkimi illu pisiarereerpoq taamaammallu qitsuit inissaqarluarlutik, massakkulli angerlaqataanaviannginnerannik eqqaasitsissutaalluni, Maniitsumilu illu Christian Haldimut aappariit annaasaannik ullut tamaasa eqqaasitsissutaalluni.
- Illorput tamarmi qitsunnut naleqqussarsimavarput. Qitsuit siniffii pequttallu qallorfissat sananikuuagut. Inuunerput qitsunnut naleqqussarsimavarput, Kim Byron oqarpoq.
Suliaq oqartussaasunit matuneqarpoq
Suliap politiinit uumasunullu nakorsamit matuneqarnerata kingunerisaanik aappariit Inatsisartut Ombudsmandiannut naammagittaalliuuteqarniarlutik aalajajangerput.
Aappariit qitsuutimik sisamaat kingullersaallu assinganik pineqarnissamut navianartorsiortinnagu qanoq Danmarkiliaatissanerlugu paasiniarpaat. Siunissamut ungasinnerusumut aappariit isiginiarsinnaanngikkallarput
