Akitsuutinik qaffaanissaq Demokraatit akerlerigaat
Akitsuusersuinissamut maannamut Siumukkormiorpaalussuit orulluteqareerput, akitsuusersuinerimmi ulluinnarni inuuniarnermi pisariaqartitat eqqussavaat, ikummatissat illunik kiassaatissat ilanngullugit.
Naalakkersuisoqataasunit Demokraatineersut aamma isornartorsiuisunut ilanngupput. Massa Demokraatit namminneq siulittaasuat Andreas Uldum siunnersuummik saqqummiisuugaluartoq.
AAMMA ATUARUK Ilisimatooq: Pisiassat akitsoraangata pisisut ikilisarput
Taamaakkaluartoq Demokraatit Inatsisartuniittuutitaasa Naalakkersuisut akitsuusersuinissamik siunnersuutaat tapersersornavianngilaat, naak nunap karsianut 96 millioner koruuninik isertitsissutaasussaagaluartoq.
- Demokraatit orniginartinneruaat isertitassat allanit aanissaat, tusagassiuutinut nalunaarummi partii taama allappoq. Pisortat suliaanni ileqqaarnikkut aningaasat pissarsiarerusunneruaat.
Demokraatilli namminneq siulittaasortik taamarsuaq saassutarinianngilaat, Naalakkersuisullu nersualaarlugit aningaasaqarnerup ataqatigiisinniarnissaanut akisussaassuseqarlutik misiliimmata, naak akitsuusersuinissaq piumanngikkaluarlugu.
Taamaattumik Demokraatit oqarput kikkulluunniit nuannariinnarlugu akitsuusersuisinnaanngittut. Erseqqissarluguli allatut aaqqeerusullutik.
AAMMA ATUARUK VIDEO Akitsuutit nutaat inuuniarnitsinnut sunniuteqassapput
- 96 millionit allanit aaneqarnissaat orniginartinneruarput. Oqaatigereersinnaavarpulli taamaaliornissaq ajornaatsuinnaanngimmat. Qanorluunniit ilioraluaraanni arlaannut tuttussaapput. Tamanna allanngortinneqarsinnaanngilaq.
Demokraatit siunnersuutigaat akitsuusersuinernut taarsiullugu pisortat sullerinnerulernerisigut ileqqaarnikkullu aningaasat pissarsiarineqarsinnaasut.
