Akitsuusersuiniarneq erseqqarinnerusoq ujartorneqarpoq

Allannguutissatulli siunnersuut paatsuunganarmat Inuit Ataqatigiinnit suli oqaaseqarfigiumaneqanngilaq.
- Naalakkersuisut piareerneqanngitsunik oqariartuuteqarput. Tusagassiuutinut nalunaarummi allassimapput kattuffiit oqariartuutaat nuannaarutigalugit. Taamaattoqarneralu tusaatissatut tigullugu. Aamma 80 oori eqqaaneqarpoq.

- Uangali inatsimmut allannguutissamik aamma naatsorsuutinik takusaqanngilanga. Taamaattumik taanna maannakkut isummersorfigisinnaanngilara, Inuit Ataqatigiit aningaasaqarnermut oqaaseqartartuat, Naaja Nathanielsen oqarpoq. Aamma oqaatigaa qaleralinnut suliarineqanngitsunut akitsuusersuinissamut Naalakkersuisut siunnersuutertik tunuartimmassuk nuannaarutigalugu.

Aamma atuaruk Qaleralinnut akitsuusiiniarneq isornartinneqaqisoq tunuartinneqarpoq

Qaleralinnut akitsuutissatut siunnersuutip siulia SIK-mit, KNAPK-mit Sulisitsisunillu isorineqarpoq.

Aalisarnermut attuumassutillit peqataarusupput

Politikkerit aalijangiineri aalisartunut kinguneqarnerlussinnaaneri KNAPK-p siulittaasuata uparuarpaa. Aalisakkanuttaaq akitsuusersuiniarnermi siunnersuusiortoqassatillugu pineqartut tusarniarneqartarnissaat amigaatiginerarlugu. Taamaaliornikkummi ajornannginnerusumik suliaq ingerlasinnaasoq, Henrik Sandgreen isumaqarpoq.

- Atuisutut aammali ilisimasaqartutut oqaatigineqartuartugut pineqartilluta aammalu aningaasanik aallertoqassatillugu minnerpaamik peqataatinneqartussaaavugut pisup eqqartorneqarnerata aallaqqaataanit naaneranut. Taamaanngippat ullumikkutut aaqqiangiinnginnerujussuaq pilersinneqartartoq,  naatsorsuutigissavarput siunissami suli ajornerulissasoq, Henrik Sandgreen oqarpoq.

Oqariartuutigineqartoq Sulisitsisunit isumaqatigineqarpoq
- Politikkikkut aaliangiisinnaaneq - uanilu pisuussutinik atuinermi akileraarusersuisinnaaneq tunngaviatigut akerlerinngilarput, kisiannili nunatta karsiata aningaasanik amingaateqarnera piinnavillungu aalisarnermiit akileraarusiisarneq isumaqataaffiginngilarput, Sulisitsisuni siunnersorti Bent Sørensen KNR-imut taama allappoq 

Akitsuusersuinissamut siunnersuut nunatta karsianut 20 millioner koruuninik isertitsissutaassaaq. Pilersaarulli malillugu novemberip 20-ani aalajangiunneqartussaavoq.