Akitsuisoqarataannaavoq
- Amigartoornissat taakkua eqqarsaatigalugit, takutikkusupparput selskabitut pitsaasutut inissisimarusulluta. Tassa imaanngilaq aningaasat amerlanerpaat, Nunatta karsianinngaanniit aajuassagigut, taanna siunertarinngilluinnarparput, Arctic Umiaq Linemi pisortaq, Jette Larsen oqarpoq.
Taassumalu oqaatigaa, uuliamut akit qaffasinnerat peqqutigalugu aasamut bilitsit akii qaffarataannaasut.
- Uuliap akia eqquisussanngorunarpoq, massakkullu misissuivugut. Immikkut ineeqqat agguaqatigiisillugu 50 kronemik akitsornissaat misissorparparput, Jette Larsen oqarpoq.
Arctic Umiaq Lineli bilitsit akiinik qaffatsitsinaveersaarniassaguni, qanoq iliuuseqassava?
- Tassa takornariat sivisunerpaamik umiarsuarmiinnissaat siunertarivarput, taakkuuppummi bilitsit akiinik appasissumik inissisimatitsisinnaasut. Taakkua akisunerusumik akiliisaramik, ilaasorisakkatsinnut Nunatsinneersunut sanilliullugit, Jette Larsen taama oqarpoq.
Imarsiornermik Qullersaqarfik imaatigut angallassinermi malittarisassanik, maanna allanngortiterileruttorpoq. Tamannalu ilaatigut, nunaqarfiit Arsuk aamma Kangaamiut siusinnerusukkut Sarfaq Ittummik tikinneqarsinnaalernerannik periarfissiivoq.
Kangaamiut arfininngornermi marsip 23-ani siullermik aqqusaarneqassaaq, kiisalu Arsuk pingasunngornermi apriilip sisamaani aqqusaarneqassalluni.
Sarfaq Ittuk Ilulissanut Aasiannullu, apriilip 27-iani aatsaat tikittalissaaq. Angalanermullu pilersaarutip ilaatigut allannguutigissavai, nunaqarfiit illoqarfiillu aqqusaallatsiarfigiinnarneqartartut soorlu; Qeqertarsuatsiaat, Maniitsoq Aasiaallu aasamut sivisunerusumik uninngaffigineqartalissapput.
