Akitsorterussinermi massa qaannat

Nuummi politiit ukiut tamaasa pisarnertut kingumut akitsorteripput.

Akitsorterinissaq sioqqullugu politeeqarfimmut suut tuniniarneqassanersut radioavisimiit alakkaavugut.

- Matu ammarakku erngerlugu takuara qajaq. Taanna puigorneqarsimavoq, taama angitigisoq qanorilillunimita puigorneqarsinnaanersoq Finn Jeppesenimut apeqqutigaarput, taanna ima akivoq:

- Uagut aamma eqqoriaqattaarparput taama angitigisoq qanorililluni puigorneqarsimasinnaanersoq. Taamaattorli uagutsinnut tunniunneqarsimammat akitsorterussinitsinni ilaatissavarput, Finn Jeppesen oqarpoq.

Akitsortigassat qimerluaalaarakkit sikkilerpassuit, sinngup puui, torlulaartaatitoqaq assigiinngitsorpassuillu takuakka. Torlulaartaatitoqaq sumit pissarsiarineqarsimanersoq Finn Jeppesenimut apeqqutigivara, taassuma nalulluinnariarlugu nangilluni oqarpoq:

- Inuit qimataat politeeqarfiliaanneqartarput imaluunniit inunnit tillinneqarsimasut politiinit arsaarinnissutigineqarsimasut ukioq ataaseq uninngasuutigeriarlugit akitsorterussinitsinni tuniniartarpagut, Finn Jeppesen oqarpoq.

- Akitsorterineq sioqqullugu ajorisagut immikkoortiteriarlugit eqqarpagut. Taamaalilluta nutaarluinnaat pitsaanersiukkallu akitsorterinitsinni tuniniassavagut, Finn Jeppesen naggasiivoq.