Akit assigiikkunnaarnerat orullutinngorpoq
Innaallagissamut imermullu akit assigiikkunnaarnerata kingunerisaanik sinerissami oqallinnerit imaaginnavilerput, naak Aningaasaqarnermut Naalakkersuisoq Josef Motzfeldt ernumassutit paasisinnaanagit oqalukkaluartoq.
Innaallagissamut imermullu akit assigiikkunnaarsinneqarnerata kingunerisassaasut taakkartorneqartut ilagaat nunaqarfiit isorliunerusullu inuerussarneqarnerat, taamali oqarnermut Inuit Ataqatigiit siulittaasuat Aningaasaqarnermullu Naalakkersuisoq Josef Motzfeldt erseqqissaavoq Naalakkersuisut nunaqarfinnik inuerusaanissaq siunertarinngikkaat.
Naalakkersuisut maanna nalilersueqqittariaqartut, ulluni kingullerni innuttaasunit politikerinillu tusartualerparput. Kingullermik Atassut sinnerlugu Inatsisartuni ilaasortat marluk, Kristian Jeremiassen aamma Godmand Rasmussen isumaat tusarpavut.
Godmand Rasmussen Qanoruumut ippassaq oqarpoq akinik assigiikkunnaarsitsineq innuttaasunut nanertuutinngortoq. - Kikkulluunniit takusinnaavaat taamaattumillu Naalakkersuisut nalilersueqqissaaqqittariaqarput, oqarpoq.
Godmand Rasmussenip neriuutiginerarpaa akinik assigiikkunnaarsitsineq aallaqqaammut misiliinertut nalilerneqarsimammat ataavartussatut Naalakkersuisut aaqqiinerissanngikkaat. Taamaattumik Inatsisartuni siunnersuutit attaveqarnermut pilersuinermut ineqarnermullu ataatsimiititaliami suliarineqartarnerat tunngavigalugu, Godmand Rasmussen akit assigiikkunnaarneri kingunerilu ataatsimiititaliami eqqartugassanngortinniarpai.
Inatsisartuni ilaasortaq Atassummeersoq alla, Kristian Jeremiassen isumaqarpoq, akinik assigiikkunnaarsitsinikkut nipaatsumik inuerusaasoqalersoq, tassa G-60 utersaartoq.
- Innuttaasut illoqarfinnut anginerusunut nutserarnerunissaannik suliaq iluatsikkiartortoq nuannaarutissaanngilaq, pitsaanerusumillu aaqqiisoqartariaqarpoq, Kristian Jeremiassen allappoq.
Kristian Jeremiassenip erseqqissaatigaa G-60 nipaatsumik utertoq, illoqarfinnilu nuuffiusussani suliluunniit piareersaasoqanngitsoq, meeqqerivitsigut atuarfitsigut inissatigullu.
- Akit qaaffakkiartuinnarput ingammik nunaqarfinni, soorlu Akunnaami innuttasut aningaasaq tigummiaat annikilliartorpoq. Pisiniarfinnissaaq akit qaffakkaluttuinnarput ingammik ukioq naallugu umiarsuaqarfiusanngitsuni, Kristian Jeremiassen tamanna pillugu isumaqarpoq assigiimmik akeqartitsineq uterfigineqaqqittariaqartoq.
Bendt Broberg Kristiansen, Ilulissani Inuit Ataqatigiit siulittaasuat isumaqarpoq, Nukissiorfiit akinik qaffaanermini Inatsisartuni aalajangiussat sipporluinnarlugit akinik inississuisoq, allaat akit 44 aamma 66 procentit angullugit qaffaateqartillugit. Taamaatumik apeqqutigerusuppaa, Inatsisartuni periusissatut saqqummiuteqqaagaq, tassalu innuttaasut 20 procentiinnaasa akitsuinermik annerpaamik 20 procentiusunik eqqugaanissaannik aalajangiussaq qimanneqarsimanersoq?
Aningaasaqarnermut Naalakkersuisoq Josef Motzfeldt erseqqissaavoq assigiimmik akeqarunnaarsitsineq pillugu nalunaarusiaq Inatsisartut ukiaru ataatsimiilerpata saqqummiunneqarnissaa ilimagigini.
