Akisussaaffiup inissinneqarnissaa ujartorpaat
- Suliaq avaanngunartoq sivitsortumik saqitsaassutaalermat, suna eqqornersoq paasissallugu pisariaqalerpoq, kikkullu akisussaanersut eqqartuussivitsigoortumik aalajangiivigisariaqalerluni, Inuit Ataqatigiit siulittaasuat Kuupik Kleist illusisarsimanerit pillugit taama oqarpoq.
Akisussaaffimmik inissiiniarnermi malitsigineqarsinnaasut pillugit aperigatsinni Kuupik Kleist ima akivoq:
- Soorunalimi eqqarsaatigisupilussuuarput, aamma inatsisartuni ilaasortatut pisussaaffigut pisinnaatitaaffigullu sumut killeqarnersut ilisimaarilluinnarpagut, aamma nalunngilarput inatsisartut eqqartuussisuusinnaanngitsut, inatsisilerituut inassuteqarnerat naapertortorlugu aamma taamaakkami, Kuupik Kleist oqarpoq, nangillunilu:
- Taamaattumik allatut ajornartumik eqqartuussiviit oqaloreerpata, inernileereerpata, naalakkersuinikkut sunik kinguneqartinneqarsinnaanera inatsisartuni ilaasortat partiillu isummerfigisinnaavaat, kisianni taanna tikillugu uppersiseqqaartariaqarparput ilumut inatsisinik ukioqqutitsisoqarsimanersoq, aappassaattullu sumi, kikkunnillu taama unioqqutitsisoqarsimanersoq aalajangiiffigisariaqarpoq, taavalu pingajussaanik sunik kinguneqartitsisoqassanersoq isummerfigineqartariaqarluni, Inuit Ataqatigiit siulittaasuat Kuupik Kleist oqarpoq.
Kammeradvokatip naalakkersuisunit suliakkerneqarnera Inuit Ataqatigiinnit apeqquserneqarpoq, kiffaanngissuseqarluni sulisinnaatitaannginnera innersuussutigineqarluni.
