Akisuasoq nipangeqqunagu ilungersorput

Pisortaagallartup, Jensine Berthelsenip tamanna KNR-imut uppernarsarpaa:

- Inunnut ataasiakkaanik tunngasunik oqaaseqarsinnaagikkaluarlunga taamaattoq ilumoorpoq Akisuasoq aningaasarsiornikkut ilungersunartorsiormat, maannalu siulersuisuunerit uangalu pisortaagallartutut tamanna aaqqinniarlugu ilungersuleruttorpugut, Akisuasumi pisortaagallartoq oqarpoq.

Aningaasarliornerup kinguneraa, radio ammaannaqqullugu ingerlatsinermut aningaasartuutinik ikililerisariaqalersimaneq. Tamannalu soraarsitsinernik kinguneqarsimavoq.

- Ajornartorsiutit anigorniarlugit sulisoqarnikkut aaqqissuusseqqippugut, sulisut ikittuararsuanngorlugit, Jensine Berthelsen oqarpoq.

Maanna oqaatigisinnaannginnerarpaa sooq Akisuasoq ingerlanerliulersimanersoq. Ingerlanerliunersimaneq sumik pissuteqarnersoq paasiniarlugu misissuisitsisoqarsimavoq.

- Misissuisitsinitta ersersippaa aningaasarsiornerput patajaatsumik ingerlanneqarsimanngitsoq, tassalu tamanna aaqqinniarlugu tamaviaarluta sulivugut, Jensine Berthelsenip oqaatigaa.

Akisuasup matunnginnissaa maanna tamaviaarutigineqarpoq.