Akissut allakkatigut takkutissaaq
Inuusuttut 142-t Storebæltip kangianut, tassa Sjællandimut taassumalu qeqertaanut, qinnuteqarput, 139-t Jyllandip Aarhusillu eqqaannut qinnuteqarlutik, 73-it Danmarkip Kujataanut qinnuteqarsimapput, tassani Odensemi ilinniarnissaminnut qinnuteqartut amerlanerpaallutik, kiisalu 99-it Jyllandip avannaanut, tassunga ilaalluni Aalborgi, qinnuteqarsimallutik. Kalaallit Illuutaat paasissutissiipput.
Sjællandimi ukioq manna ilinniarnissaminnut qinnuteqartut ukiunut siuliinut naleqqiullugit ikileriarsimasut, Kalaallit Illuannit Københavnimiittumit nalunaarutigineqarpoq. Akerlianilli Storebæltip kitaanut qinnuteqartut 215-inik amerleriarsimallutik.
Danmarkimi ilinniarnissaminnut qinnuteqartut juulip 30-anni akineqassapput. Inuusuttut 800-t missaanniittut Danmarkimi maannakkorpiaq ilinniartuupput.
Danmarkimi ilinniartut ukiut tamaasa Nunatsinni aasarsioriartarput timmisartumullu billetsit Namminersorlutik Oqartussanit akilerneqartarluni. Ilinniartut Nunatsinnut attaveqaannarnissaat anguniarlugu taamaaliortoqartarpoq.