Akissarsiat pillugit saqqummiusserusunngillat
Innuttaasut akornanni pasipiluinerit tunngavigalugit oqallisilernissaq pinngitsoorniarlugu Demokraatit sinnerlugit Inatsisartuni ilaasortaq Jens B. Frederiksen naalakkersuisunut taama apeqquteqaateqarpoq, akissarsiallu annertussusaasa avammut saqqummiunneqarnissaat ujartorlugu, soorlu Københavnip kommuniani taamaaliortoqarsimasoq.
Naalakkersuisoqarfiilli pisortaasa aningaasarsiaqartitaanissaat kattuffinnut isumaqatiginninniarsinnaatitaasunut suli isumaqatigiissutigineqanngimmat tamakku pillugit paasissutissat tunniunneqarsinnaanngikkallartut naalakkersuisut akissumminni allapput.
Namminersornerullutik Oqartussani atorfinnut aningaasarsiaqartitaanikkut atorfeqartitaanikkullu atugassarititaasut sulianik takunnissinnaatitaaneq pillugu tamanut saqqummiussisussaatitaaneq pillugu inatsimmi malittarisassat ataaniipput, isumaqatigiissutigineqarsimasullu tamanut ammapput, soorluttaaq paasiniaasoqarsinnaasoq, sulisulli aalajangersimasut aningaasarsiaat pillugit Københavnip Kommuneata iliorneratulli naalakkersuisut ikkussinissaminnut pilersaaruteqanngitsut, naalakkersuisut siulittaasuat Hans Enoksen akissummi allappoq.
