Akissarsiagissaarnerunissaq innarluutilimmit ujartorneqarpoq
Frederik Jeremiassen atuakkanik atorniartarfimmi ikiortitut sulinermini tiimimut 80 koruuninik akissarsisarpoq, innarluutillit naliginnaasumik illersdugaasumik sulinerminni tiimimut 15 koruuninik akissarsitinneqartarput, kisiannili Frederik Jeremiassenip sulisitsisumik isumaqatigiissutigiissuteqarnermigut taamatut akissarsiaqarpoq.
Sulinermi inuttut naligisatut pineqarneq Frederik Jeremiassenip assut iluarusuutigaa, tamanullu atuuttariaqaraluarnerarlugu. Taanna 1992-imili kaassuartakkanik assakaasulinnik ingerlateqartariaqalerpoq, isumaqarpoq innarluutillit illersugaasumik sulisut tiimimut 15 koruunisisarnerat naammanngitsoq.
- Soraarnerussutisiakittuararsuungama akissarsiakka assut iluaqutaaqaat. Ineqarnermut, kiassarnermut, sarfamut allarpassuarnullu akilersugassanut tapertarisorujussuuakka, allaat ullormut taamatut sulisarsimanngikkaluaruma ulloq manna tikillugu immaqa akiligassakka qaleriiaallutik akilerneq sapilersimassagaluarpakka.
Frederik Jeremiassen isumaqarpoq, siusinaarlutik soraarnerussutisiallit ukiumut pisartagaat 88.000 koruuniusut ilanngaavigineqaratik saniatigut qanoq isertitaqarsinnaatigineq innorluutilinnut innarluuteqalersimasunullu tamanut paasisitsiniutaasariaqartoq.
