Akinik misissuinerup tutsuiginassusaa suli apeqqusersorpaat

Nalunaarusiaq pingaaruteqartoq, KNAPK-p pisortaata tulliata, Tønnes Berthelsenip oqaatigaa.

- Ukiut tamaasa akit allanngoriartorneri misissortassallugit pingaaruteqarput, soorlu isumaqatigiinniarnerni kisitsisinik ilumoortunik aallaaveqanngikkaanni ajorsarnissaq qaninneerarsuusarpoq. Taamaattumik pingaaruteqarpoq ukiut tamaasa misissuitsitsisarnissaq, Tønnes Berthelsen oqarpoq.

Nalunaarusiamik suliaqartut, Gemba Seafood Consulting A/S-ip saqqummiussinerani paasinarsivoq, aalisakkat qaleruallillu akii, Canadamut sanilliukkaanni Nunatsinni akigitinneqartartut appariarsimanngikkunik akii nikinneq ajortut.

Nunatsinni akit nunani allani akigitinneqartunut, soorlu Norgemut, Islandimut Canadamullu naleqqiukkaanni, Nunatsinni akiluttortitsineq isumaqatigiinniarnerni illuatungeriinnit akisussaaffigineqartoq, Tønnes Berthelsenip oqaatigaa.

- Soorunami illuatungeriit pisooqatigiipput, kattuffimmillu nassuerutigissavarput pisooqataanerput. Pitsanngorsaavugut atortunillu inerisaalluta, soorlu una nalunaarusiaq eqqarsaatigiinnarlugu, taannami najoqqutaralugu akinik pitsaanerusunik angusaqarsinnaavugut, Tønnes Berthelsen oqarpoq.

Aalisakkat aningaasarsiornermi tunngavigineqartut akii pillugit misissuinermit angusat saqqummiunneqarneranni Kalaallit Nunaanni Sulisitsisut Peqatigiiffiannit, GA-amit aalisarnermi avammullu tuniniaanermi atatsimiititaliap siulittaasua, Henrik Leth najuuppoq. Taanna oqarpoq misissuinermi inernerit atorneqarsinnaanngitsut.

- Gemba-p nalunaarusiaanut siullermut una assiguvoq, piviusorsiortuunngilaq misissuisitsinerlu aningaasanik atuinerlussinnarneruvoq. Misissuineq kukkunernik ulikkaarpoq, ilaatigut Kalaallit Nunaata Danmarkillu naatsorsueqqissaartarfii uangullu GA-mit suleqatigiilluta, aalisakkat avammut tunisaasartut akii pillugit aaqqiiniarnerigaluarput isigineqarsimanani, tassami tamanna kukkuneqarsimammat, Henrik Leth oqarpoq.

KNAPK-milli tamanna ima illuatungilerneqarpoq.

- Ukiuni kingullerni maluginiarparput aalisakkanik nioqqutissiortut akit pillugit isumaqatigiinniarusunngitsut. Tamatumalu kinguneraa akit nikippiartannginnerat. Nunatsinni unammilleqatigiinneq killeqarpoq, taannalu aamma ajornartorsiutaalluni. Aalisakkanik nioqqutissiortut Nunatsinni marluinnaapput, akinillu unammillertoqarpiassanani. Akinilli unammisoqartillu sinerissap ilaani akinut malunniuttarpoq. Tassa ajornartorsiutaaneruvoq uammilleqatigiinneq Nunatsinni takussaarpianngimmat, KNAPK-imi pisortap tullia Tønnes OK Berthelsen taama oqarpoq.