Akiliutip allannguutissaanut nalunaarummik tigusaqarput
A/S Inissiaatileqatigiiffik INI-p piffissaagallartillugu Namminersornerullutik Oqartussanut illuutinik piginnittutut 2008-mut missingersuutinik naliliisitsisimannginnera aappassaaneerluni nalunaaruteqarnermut peqqutaavoq, Ineqarnermut Pisortaqarfik nassuiaavoq.
Namminersornerullutik Oqartussat illuutinik piginnittutut pisussaavoq, najugaqarfinni naammaginartunik ileqqaagaqartoqarsimanera misissussallugu.
Najugaqarfinni ilaqutariinnut arlalinnut inissiartaqartuni attartortunut tunngatillugu najugaqarfiit missingersuutaat ima allannguuteqartinneqarput:
-Aserfallatsaaliuinissamut ileqqaakkat maannamut missingersuutaasimasunut naleqqiullutik 2,5 procentimik qaffanneqassapput.
Najugaqarfimmi aserorterisarnerup akiorniarneqarneranut inissiap annertussusaanut kvadratmeterimut 4 koruuunit immikkoortinneqartassapput.
Aamma najugaqarfinni annertuumik sumiginnagaasimasuni pitsanngorsaanissamut inissiami inigisap annertussusaanut kvadratmeterimut 6 koruunit immikkoortinneqartassapput, Pisortaqarfimmit nalunaarummi taama allassimasoqarpoq.
Najugaqarfinni ilaqutariinnut ataatsinut inissiani attartortut aserfallatsaaliuinermut ileqqaagassat 2,5 procentimik qaffanneqassapput, najugaqarfinnili ilaqutariinnut ataatsinut inissiartaqartuni aserorterisarnerup akiorniarneqarneranut imaluunniit najugaqarfiit pitsanngorsarneqarnissaannut akiliisitsisoqartassanngilaq.
Namminersornerullutik Oqartussat illuutaanni najugaqarfiit tamarmik ileqqaagaat qaffanneqartariaqarput, taamaattumillu tamanna tunngavigalugu ineqarnermut akiliutit iluarsiivigineqarnissaat aqqutissaavoq eqqortoq.
