akiliutaavallaarsimasut maanna utertinneqalerput
Napparsimasut Qallunaat Nunaannut katsorsartikkiartortut nakorsartinneranni aningaasarpassuarnik Nunarput akiliivallaartarsimasoq paasineqareersorlu Nunatsinni Peqqinnissaqarfik aamma Qallunaat Nunaanni Peqqissutsimut ministeriaqarfik ataatsimeeqatigiipput.
Aappaagumut 2012-imut atuuttussamik aamma isumaqatigiissusiortoqartoq, peqqinnissaqarfimmit oqaatigineqarpoq:
- 2011-imi maannamut aningaasartuutaavallaarsimasut pillugit aaqqiisoqqarnissaa isumaqatigiissutigineqarpoq, tamannalu angusinnaagatsigu nuannaarutigeqaarput, Peqqissutsimut Naalakkersuisoqarfimmi pisortaq Ann Birkekær Kjeldsen oqarpoq.
Napparsimasut Nunatsinniit Danmarkiliarlutik katsorsartikkiartorneranni Nunatta peqqinnissaqarfiata ukiorpassuarni akiliivallaartarsimasutut, Dronning Ingridip Napparsimmavissuani nakorsaanerup Carsten Thordahlip nalilereeraalu, Peqqisutsimut Aqutsisoqarfiup kukkunersiuisut Deloittekkut misissuisippaat. Nunattalu peqqinnissaqarfiata ukiumut 15-it aamma 20-t millionit koruunit akornanni akiliivallaartarsimasoq, Deloittep inerniliuppaa.
Peqqissutsimulli Aqutsisoqarfiup Dronning Ingridip Napparsimmavissua suleqatigalugu napparsimasut Danmarkiliarlutik katsorsartikkiartortussat immikkut ilisimasalinnit katsorsarneqassanersut maanna nalilertalissavaat:
- Napparsimasoq katsorsartikkiartortussaq immikkut ilisimasalinnit katsorneqassanersoq, taamalu akisunerusumik katsorsarneqassanersoq, imaluunniit akit nalinginnaasut atorlugit katsorsarneqassanersoq, Peqqissutsimut Aqutsisoqarfiup Rigshospitalillu akunnerminni nalilertalissagaat naatsorsuutigaara, Ann Birkekær Kjeldsen oqarpoq.
Napparsimasut katsorsartikkiartornerannut Nunatta peqqinnissaqarfiata maanna sipaaruteqalertussaanera pissutaalluni, Nunatsinni peqqinnissaqarfik aningaasaateqarnerulernavianngitsoq, Ann Birkekær Kjeldsenip erseqqissaatigaa:
- Inuiaqatigiit aningaasarsiornerannut sunniuteqassaaq. Peqqinnissaqarfiup missingersuutaanut sunniuteqarsinnaagamik, nalimmassaasoqarsinnaalluni. Pingaartumik napparsimasut nunani allani katsorsartikkiartortussat pillugit konto sunnerneqarsinnaalluni. Erseqqissaatigerusuppara Peqqinnissaqarfik aningaasaateqarnerulernavianngitsoq, peqqinnissaqarfimmut aningaasaliissutit peqqinnissaqarfimmi suliassat naapertorlugit aningaasanut inatsimmi aningaasaliisoqartarmat, Peqqissutsimut Naalakkersuisoqarfimmi pisortaq, Ann Birkekær Kjeldsen oqarpoq.
Ataatsimeeqatigiinnermi oqaluuserineqartut ilagaat Nunatta Danmarkillu suleqatigiinnissaannik isumaqatigiissutaasimasoq 1998-imeersoq, aammalu eqqartorneqarpoq Avanersuarmi inuit akornanni peqqissusaasa misissorneqarnerata kingorna malitseqartitsisimaneq.