Akilinermut timmisartuussisalernissaq ICCp taperserpaa

Nunatta Nunavuullu akornanni timmisartukkut attaveqalernissaq Inuit Issittormiut Siunnersuisoqatigiiffiata maanna tapersersorpaa. Taamatut oqaaseqaateqarput Inuit issittormiut siunnersuisoqatigiiffiata ICC-p aallartitai, Nuummi februaarip aqqarnanni aqqaneq aappaannilu ataatsimeereerlutik.
Allattoq Elisa Isaksen
februaarip 15-at 2011 06:10

Oqaaseqaammi ICC-p Air Greenland kajumissaarpaa, Canadamut timmisartuussinermik aallartitsiniarnermini Nunavut salliuteqqullugu.

- ICC-p anguniagaasa pingaarnerit ilagaat naggueqatigiit Inuit suli qaninnerusumik attaveqaqatigiinnerulernissaat, tamannalu aatsaat pitsaasumik toqqaannartumillu pisinnaavoq, Nunavuup Kalaallit Nunaatalu akornanni angallannikkut aaqqiisoqarneratigut, ICC naqissusiivoq.

- Kulturikkut, ilinniartitaanikkut, inuussutissarsiornikkut naalakkersuinikkullu ullumikkut attaveqaqatigiinnerput, angallannikkut pissutsit ajornerat pissutaalluni, unissimasutullusooq ippoq. Taamaattumik isumaqarpugut timmisartukkut Iqalunnut toqqaannartumik attaveqalernikkut pissutsit pitsanngorujussuassasut, ICC-mi aallartitat sinnerlugit Nuka Kleemann allappoq.

Tamanna tunngavigalugu ICC-mi aallartitat kajumissaaripput, Air Greenlandip Canadamut timmisartukkut angallannikkut piffissami qanittumi attaveqarfissamik nassaarniarnermini, naggueqatigiit Inuit attaveqarnerulernissaannik kissaatinik paasinnilluni suliumaartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq