Akilinermiut filmiliaat Oscarinnattussatut innersuunneqarpoq

Siullermik Akilinermiut filimiliaat ”The Necessities of Life”, Montreal Film Festivalimi akissarsitinneqartoq, Filmi taanna, Los Angelesimi filminik aappaagu nersornaasiisoqarnerani Oscarimik nersornaaserneqarnissaminut periarfissaqalerpoq.
Allattoq Louise M. Kleemann
septembarip 18-at 2008 07:02

Filmiliortartup Benoit Pilon-ip filmiliaa “ nunani allamiut filmiliaanni pitsaanerpaatut” Oscarinnattussatut innersuunneqassaasoq, Canadami aalajangiunneqarpoq.

Filmimi “The Necessities of Life” imi – “ Inuunermi pingaaruteqarnerpaat”-mi oqaluttuarineqarpoq, piniartoq naggueqatigiinnit Inunneersoq Tivii sakialluummik nappaateqarluni nunaqarfimminit Quebecimut ’50-ikkunni peqqissariartortinneqartoq.

Filmimi Tiviip silarsuarmik nutaaliaasumik takornarluinnakkaminik naapitseqqaarnera oqaluttuarineqarpoq, tassa oqaatsit inooriaaserlu paasisinnaanagit. Tassani nukappiaraq naggueqatigiinnit Inunneersoq aamma napparsimasoq naapippaa, marluullutillu ikioqatigiinnermikkut inoorusussuseqaleqqipput.

Naggueqatigiinni Inunneersoq isiginnaartitsisartoq Natar Ungalaaq filmimi inuttaavoq. Ungalaaq filmimi “Atanarjuat”-ni nersornaasikkami inuttaareerpoq.

Oscarinnattussanik aalajangersaasartut Pilonip filmiliaa taanna filminut tallimaasunut 2009-mi akissarsitinneqartussanut ilaassanersoq aalajangiiffigisussanngorpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq