Akilinermiit Nunatsinnut aappaagumiit takornariartitsisalerniarput

Angalatitseqatigiiffik Nunavimmi suliffeqarfimmit Makivik Corporationimit 75 procentimik pigineqartoq, maannamut Canadap issittortaani Sikuiuitsumilu Kujallermi takornarianik angallassinerusaraluartoq, maanna pilersaaruteqalerpoq Akilinermi Kuujjuarmiit imaluunniit Iqalunniit, Sisimiunut, Ilulissanut Upernavimmullu takornarianik aappaagumiit angallassisalerniarlutik.

Suliffeqarfiup russit umiarsuaat takornarianik 120-nik angallassisinnaasoq attartorniarpaa.

Radioaviisip Canadami ilanngutassiortuata Marianne Stenbækip oqaatigaa, Akilinermit Nunatsinnut takornarianik angallassinerit kulturimik nittarsaassinermut aamma atorneqarniartut, taamaalillutik Nunavimmiut kulturiminnik issittumilu pinngortitamik allanngutsaaliuinermut nungusaataanngitsumillu piniarnermut isummaminnik ersersitsisinnaaniassammata.