Akilinermi Kivallerni uranimik nassaartoqarpoq
Nunarsuarmi uranimik pisariaqartitsisoqarpoq, tassami atomip nukinga atorlugu nukissiorfinnik sanaartornissamik pilersaaruteqartoqarmat. Ingammik Kina uranimik pisinissamik kissaateqarpoq, tassami atomip nukinga atorlugu nukissiorfiit nutaat 40-t sanaartorneqarnissaat pilersaarutigigamikku.
Akilinermi Kivallermi innuttaasut, tassa Hudsonip Kangerliumanersuata kimmut sineriaani nunallit uranisiorsinnaaneq pillugu 1990-imi taasitinneqarput. Taasisitsinermi amerlanerussuteqarluartut naaggaarput, tassa 90 procentit naaggaaramik. Tassa taamanikkut nunaminni uranimik piiaasoqarnissaa kissaatiginngilaat. Taamanikkut uranip akia appasissorujussuuvoq, maannali uranip akia quleriaammik qaffasinneruvoq. 2006-imi Qamanersuarmi, tassa Baker Lakemi borgmesteri, David Aksawnee oqaaseqarpoq, Qamanersuarmi nunallu immikkoortuani tamaani inuit neriuutissaaruteqqasut, tassa suliffissaaleqisut 70 procentiummata. Taamaattumik innuttaasut allatut isummersimanerarlugit aatsitassarsiortunullu sulerusussuseqarnerarlugit.
Ukiup ataatsip matuma siornagut Nunavut Tunngavik suleqatigalugu ingerlatseqatigiiffimmik pilersitsisoqarpoq, taallugu Kivalliq Energy Corporation, tassani Nunavummi aningaasarsiornikkut ineriartortitsinissaq siunertarineqarluni. Ingerlatseqatigiiffimmi pisuussutinik misissuinissaq siunertaralugu pingasunik suliniutinik pilersaarusiortoqarpoq. Marluk uranimik ujaasissallutik ataaserlu kuultimik aatsitassanillu allanik ujaasissalluni. Ingerlatseqatigiiffimmut tusarluarnartumik ullut qulit matuma siornagut tutsiuttoqarpoq, tassa Nunavummi Lac Cinquantep eqqaani uranimik isumalluarnartumik nassaartoqarsimammat.
Taamaalilluni Qamanersuup eqqaani uranisiornissamut periarfissaqalerpoq. Taamaattorli soorlu nunatsinnisuulli uranisiornissaq assigiinngitsunik isumaqarfigineqarpoq, taamaalilluni Canadami naggueqatigiit Inuit tamatumunnga assigiinngitsunik isumaqarput. Soorlu Nunatsiavummi, tassa Labradorimi uranimik ujaasisoqarsinnaanera ukiuni tallimani uninngatikkallarneqarpoq. Aamma indianerit Canadamiittut USA-miittullu inooqatigiikkuutaat arlalissuit nunaminni uranisiortoqarnissaa akerleraat.
