Akilinermi issittoq pillugu ilisimatusarfippassuit

Canadami maannakkorpiaq issittoq pillugu suliniutit arlallit ingerlanneqarput. Suliniutigineqartut ilaat tassaavoq issittumi ilisimatusarnerup pitsanngorsarnissaa annertusarneqarnissaalu, Nunavimmiulli ukiut 20-t matuma siornagut namminneerlutik ilisimatusarfiliorput.

Canadap issittortaa nunap immikkoortuinut sisamanut agguataarsimavoq. Ilisimaneqarnerpaaq tassaavoq Nunavut, Nunavilli nunap immikkoortuani Quebecimiittoq nunap immikkoortaraa namminersulernissaminut suliniuteqarluartoq. Nunavik Frankrigisut angitigingajappoq, naak tamaani inuit illoqarfinniittut nunaqarfinniittullu 10.000-it missiliuinnaraluaraat.

Nunap immikkoortua tamanna Makivik Korporationimit aqunneqarneruvoq, tassangaanniillu aamma aningaasaqarnikkut ineriartorneq isumagineqarluni. Makivik inunnit tamakkerlugu pigineqarpoq.

Makiviup namminerisaminnik ilisimatusarfeqarfitsik, The Nunavik Research Center Kuujjuarmiittoq pilersippaa ukiullu 20-t sinnerlugit Kuujjuarmiunik peqateqarluni avatangiisit, aalisakkat uumasullu kiisalu qangaaniilli nerineqartartut ilisimatusarfigineqartarlutik. Tamaani qangaanit ilisimasat nunanilu killerni ilisimatusarneq katigunneqartarput. Ilisimatusarnermut qitiusoqarfik Makiviup pisuussutinut uumassusilinnut pisortaqarfianit aqunneqarpoq Makivimmilu vicepræsidentit ilaannit Johnny Petersimit siulersorneqarluni. Ilisimatuut ikittuinnaat kujataatungaaneersuupput, tassami najukkami tamaani najugallit tassaanerummata tassani ilisimatusartuusut. Ilisimatusarneq ilaatigut aallaaniarnermut piniarnermullu pitsaasunik inerneqartarpoq. Canadami naalakkersuisut qanittukkut 25 mio. kr.-inik aningaasaliissuteqarput, Makivimmi ilisimatusarnermut qitiusoqarfiup allilerneqarnissaanut Nunavimmiullu ukiuni amerlaqisuni ingerlanneqartutut kiffartuunneqarnissaannut naammattunik.

Marianne Stenbækip Montrealimit ilanngutassiaa Holger P. Petersenimit kalaallisuunngortinneqarpoq.