Akilinermi inuusuttut paasisassarsiorlutik angalalerput
Angalanissamut aallarniutitut Akilinermi Kuujjuarmi paasissutissiilluni persuarsiornartumik ullumi naapeqatigiittoqarpoq.
Atuartut 79-it 14-iniit 19-inut ukiullit, ukiormanna angalaqataanissamut, taaneqartumut students on Ice, tassa ilinniartut sikumiittunik taasinnaasatsinnut toqqarneqarsimapput. Ilinniartitsinermut atatillugu ingerlanneqartartoq taanna ukiormanna ukiut qulissaannik ingerlanneqarpoq, taamatut angalanerni inuusuttut Sikuiuitsumut Kujallermut imaluunniit Sikuiuitsumut Avannarlermut angallanneqartarput. Taamatut angalatitsineq naggueqatigiit Inuit kattuffiannit, Nunavimmiittumit Makivimmit ilaatigut aningaasaliiffigineqarpoq. Taakkulu umiarsuaat Lyubov Orlova, Nunaviup aamma Qeqertaaluup sineriaanni sapaatip akunnerini marlunni angalanerminni ineqarfigiitigalugu angallatigissavaat.
Angalaneq arlalinnik siunertaqarpoq. Siullertut naggueqatigiit Inuit inuusuttaat, inuusuttunik naggueqatigiinnit Inunneersuunngitsunik suleqateqarneq misilissavaat, inuusuttullu imminnut ilinniarteqatigiissapput. Inuusuttut naggueqatigiinnit Inunneersut Nunavimmiut aamma Nunavummiut 25-t ukiormanna angalaqataassapput. Taamaattorli siunertami pingaarnerutinneqartoq tassaavoq, inuusuttut nunarsuaq allatut misigissagaat, nunarsuarmillu ataqqinninnerulissasut, ingammillu nunarsuup isui marluusut, tassa Sikuiuitsoq Kujalleq aamma Avannarleq ilisimanerulissagaat.
Sapaatip akunnerini marlunni angalanissami, angalaqataapput uumassusilerituut, ujarassiuut ilisimatuullu allat, eqqumiitsuliortut, naggueqatigiillu Inuit utoqqartaat katillugit 35-t, inuusuttut isumassarsitinneqarlutillu paasissutissinneqarluarnissaannik isumaginnittussat.
Kitty Gordonip Makivimmeersup oqaatigaa, taamaaliornikkut inuusuttut nunat issittut pingaaruteqarnerannik paasitinneqassasut.
Umiarsuaq angallatigisaat ukiuunerani maanna angalanermut assingusumik Sikuiuitsumut Kujallermut angalatinneqartarpoq.
Aasaq manna angalanissaq Kuujjuarmi ullumikkut nalliuttorsiorpaluttumik katerisimaartoqarneranik aallarnerneqarpoq.
Canadami ilanngutassiortutta Marianne Stenbækip ilanngutassiaa taamaalillugu saqqummiupparput.
