Akiliisinnaajunnaartutut nalunaarutigineqarnini aarleqqutiginngilaa
- Kanukokap taama nalunaarutigimmatigut eqqissilluta tiguarput, KIMIK A/S-ip allaffissornikkut pisortaa, Ian Wennerfeldt, oqarpoq.
- Akiliisinnaajunnaartutut nalunaarutigineqarnerput taamaallaat eqqartuussivimmut qaaqquneqarnissatsinnik kinguneqaannartussaavoq, tamannalu aqagu ullaakkut qulingiluanut pissaaq. Tamatuma kingorna qanoq inerniliisoqassanersoq takujumaarparput, Ian Wennerfeldt radio aviisimut oqarpoq.
Taassuma eqqartuussiviup inerniliiumaarnera eqqoriarumanngilaa.
- Eqqartuussiviup inernissaa isumalluarfigaara, radioaviisikkullu qanoq eqqoriaasinnaanerlunga oqaatigerusunngilara, Ian Wennerfeldt suliamik tamatuminnga qatsussisimaqisoq oqarpoq.
- Tamanna persuarsiutissaanngilaq, kommunet kattussuunnissaannut atatillugu qarasaasialerinissatsinnut suleqatikkalu eqqissilluta sulerusuinnarpugut. Kommunet kattussuunnissaat aajunaararsuanngorpoq, uagut kisitta kommunit kattunnissaannut atatillugu qarasaasiatigut aaqqiisinnaavugut. Akileraartarnissamullu atatillugu qarasaasiatigut periusissaq nutaaq aamma aallartereerparput, taamaattumik allamik kissaateqanngilanga eqqissinissatsinnik. Uagummi maaniinngikkaluarutta avammummita qanoq pisoqarsimassagaluarpa? Apeqqullu taanna soqutiginarnerujussuuvoq 17,2 mio. koruuninik apeqqusiinerminngarnit, Ian Wennerfeldt oqarpoq.