Akiliisinnaajunnaarnerup RAL eqqorsinnaavaa

Akiliisinnaajunnaarnerup Royal Arctic Linemut kinguneriumaagai pillugit oqaaseqarnissamut suli siusippallaartoq Royal Arctic Line-imi pisortaaneq Jens Andersen nalunaarpoq.

- Inatsisileritoorput suleqatigalugu periarfissat assigiinngitsut piareersarnerinut ullut tulliuttut atussavavut. Taamaattorli qanorpiaq pisoqarnissaa utaqqimaartariaqarparput, Jens Andersen oqarpoq. Taassumali erseqqissarpaa, Royal Arctic Linep aningaasaliissutai sillimmaserneqarsimanertik pissutigalugu navianartorsiunngitsut.

Nutaanik sanaartortitsineq - imaluunniit sanaartortitat ilaat - naammassineqarsinnaanersut, imaluunniit akiliisinnaajunnaartoqarneratigut umiarsualiorfimmik allamik ujaasisoqartariaqassanersoq, maanna misissorneqassasoq ilanngullugu nalunaarutigineqarpoq. Nalunanngilarli, Royal Arctic Line-p umiarsuassai kinguartoorput.

Umiarsualiorfik 'P und S Werften' naalagaaffiup immikkoortuanit aamma Tysklandimi naalakkersuisunit piffissami sivisuumi ikiorserneqartarpoq. Taamaattumik akiliisinnaajunnaarnermik qinnuteqarnissaq pillugu umiarsualiorfimmi sulisut ullumi ilisimatinneqarmata, forbundskansler Angela Merkel aamma najuuppoq.