Akiliisinnaajunnaarnermik suliap ingerlarnga True North Gemsip misissuiffiginiaraa
Suliffeqarfimmi akiliisinnaajunnaartumi True North Gems Greenlandimi pigisanik nalilinnik LNS Greenlandimut (maanna Greenland Rubymik taaguuteqartumut) tunniussineq nukingiunneqarpallaarsimavoq taamaattumillu akiliisinnaajunnaartoqarnera misissuiffigineqartariaqarluni, Qeqertarsuatsiaat eqqaanni rubinisiorfimmik piginnittuusimasoq, True North Gems, taama nalunaaruteqarpoq.
Akiliisinnaajunnaarnermi suliap ingerlarngata misissuiffigineqarnissaa Danmarkimi eqqartuussissuserisutut suliffeqarfimmut Skau Reipurth & Partneremut suliakkiissutigisimallugu ingerlatseqatigiiffiup ilisimatitsissutigaa.
- TGX-imi (True North Gemsimi, aaqq.) siulersuisut pisortaqatigiillu isumaqarput inatsisitigut suliap siumut isummereerluni tuaviuussillunilu ingerlanneqarsimanera pissutigalugu ingerlatseqatigiiffik aktianillu piginneqataasut naapertuilluanngitsumik pineqarsimasut, tamanna TGX-imi aktianik piginneqataassutit nalinginut kingunerlutsitsingaatsiarsimammat, ingerlatseqatigiiffiup pisortarigallagaa, Andrew Lee Smith nalunaarummi taama allappoq.
AAMMA ATUARUK True North Gems Greenland akiliisinnaajunnaartoq
True North Gems Greenland siorna septembarip qaammataani akiliisinnaajunnaarpoq, True North Gemsimillu piginnittut Canadamiuusut isumaqarput ingerlatseqatigiiffimmi pigisat nalillit tuniniarnissaat akiliisinnaajunnaartup pigisaanik nakkutiginnittussat tuaviuussimagaat.
100 millionit amigaatigigai
Eqqartuussissuserisoq Nuna Advokaterineersoq, Peter Schriver, akiliisinnaajunnaartup pigisaanik nakkutiginnittussatut marluusut aapparaat, taassumalu misissuisitsisoqarnissaanik ilisimatitsisoqarnera isumalukuutiginnginnerarpaa. Taannami isumaqarpoq akiliisinnaajunnaartoqarneranik suliaq pitsaanerpaamik ingerlanneqarsimasoq:
- Pissusissamisut ingerlanneqarpoq. Ingerlatseqatigiiffiup aningaasaataarussimanera, taamatullu inissisimanermi aningaasat pissarsiarineqarnissaannut periarfissaqanngitsoq siulersuisut isumaqatigiissut nalilerpaat. Taamaammat ingerlatseqatigiiffiup akiliisinnaajunnaarnera siulersuisunit nalunaarutigineqarpoq, Peter Schriver KNR-imut taama oqarpoq.
AAMMA ATUARUK Qeqertarsuatsiaat eqqaani rubinisiorfik LNS Greenlandip ingerlatilertussanngorpaa
Peter Schriverip siornatigut ilisimatitsissutigaa ingerlatseqatigiiffiup suliniutip ingerlariaqqinnissaanut 100 millionit koruunit missaat amigaatigisimagai.
