Akiliisinnaajunnaarlutik ukioq kingulleq matusariaqartut amerleriarput

Nunatsinni suliffeqarfiit 14-t ukioq kingulleq akiliisinnaajunnaarnertik pissutigalugu matusariaqarsimapput.

Akiliisinnaajunnaartuni sanaartornermik suliallit amerlanerupput. Kalaallit Nunaanni Sulisitsisut Peqatigiiffiatali sanaartornermik suliaqartut matoorarneri amerliartussangatinngilai.

Matusut amerlagisassaanngikkaluarlutik 2004-mut sanilliullutik 55 procentimik qaffariarput, taamanikkut suliffeqarfiit qulingiluat akiliisinnaajunnaarnertik peqqutigalugu matusariaqarsimapput.

Danmarkimi misissueqqissaartarfiup, Experianip, nunatsinni suliffeqarfiit 943-t allattugaatigai taakkulu akornanni akiliisinnaajunnaarlutik matusariaqalersimasut ilanngullugit allattorneqarsimasut takuneqarsinnaapput.

Narsamiittoq Eskimo Pels 2005-imi oktobariugaa akiliisinnaajunnaarluni matusariaqartunut ilaavoq.

Suliffeqarfiit akiliisinnaajunnaartut affai illoqarfiit pingaarnersaaniipput, tassani ilaatigut Nuuk Net Café akiliisinnaajunnaarluni matusariaqarsimavoq.

Sanaartornermik suliaqartut arlalippassuit aamma akiliisinnaajunnaaramik matusariaqarsimapput, annerusumik qalipaanermik sanaartornermillu suliffeqarfiutillit matusimallutik. Eqqornerusumik oqaatigalugu Nuummi qalipaanermik suliaqartut pingasut ukioq kingulleq matusimapput.

Kalaallit Nunaanni Sulisitsisut Peqatigiiffianni pisortaq Ole Rud oqarpoq, akiliisinnaajunnaarlutik matusartut amerliartornissaat ilimananngitsoq.

Suliffeqarfiit minnerusut aallarterlaat akiliisinnaajunnaarlutik matusariaqartartut Ole Rudip erseqqissarpaa.

Kalaallit Nunaanni Sulisitsisut Peqatigiiffiata suliffeqarfiit aningaasarsiorluartutut nalilerpai.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat