Akiliisimasoq nukingisaarummik nassikkaat

- Nukissiorfiup sullissinera ajorpoq, akiliinissarluunniit tatiginarunnaarpoq, Nukissiorfimmi atuisuusoq Naimangitsoq Petersen Qaanaami najugaqartoq taama oqarpoq.

Naimangitsoq Petersenip Nukissiorfimmi akiliisimanerminut uppernarsaateqaraluarpoq. Tassani takuneqarsinnaavoq Naimangitsoq Petersen akiligassani akilersimagai, nassiuppaalu aamma nukingisaarutit ataasiinaangitsut, tassani atuarneqarsinnaapput, innaallagissamut akiliingikkuni illumi innaallagissamut qamitaanissamut siorasaarutit.

Qaammatit pingasukkaarlugit Naimangitsoq Petersen-ip kallerup inneranut akiligassani akilertarpai.

Qanormita Nukissiorfimmi atuisutut misigisimanarpa? Naimangitsoq Petersen ima oqarpoq:

- Toqqissisimananngilaq. Tassa akiliisimagaluarluta akiliisimanngitsutut Nukissiorfiup qullersaqarfianiit allaffigineqartarpugut. Atuisuulluni toqqissisimanngilaq taamatut kiffartuunneqarneq. Matusinissamik siorasaarummik pingasoriarluta decembarip ingerlanerani nassinneqarpugut, naak akiliinikuugaluarluta. Paasinarpoq ataqatigiissumik sullissisoqanngitsoq, Naimangitsoq Petersen oqarpoq.

Karsten Stounberg Nukissiorfimmi aningaasaqarnermut pisortaq Radio-aviisimut oqaaseqartsinniaraluaratsigu iluatsinngilarput.

- Inunnut ataasiakkaanut sullitatsinnut sullissineq oqaaseqarfigisinnangilarput. Karsten Stounberg oqarpoq.