Akiliinani utaqqiisaasumik ineqarnermut millionerpassuit atorneqartarput
Kattuffiit Namminersorlutillu Oqartussat isumaqatigeeqqammerput, sulisut sivikitsuinnarmik atorfeqartussat taartaasullu, ineqarnerminni ingerlatsinermut tapiummik akiliisassasut. Tassalu utaqqiisaasumik inigisamut akiliisoqartassangilaq.
Aningaasaqarnermut naalakkersuisoq Palle Christiansen Kattuffiit isumaqatigiinniarfiata politikkikkut pisortaraat:
- Kinaluunniit akeqanngitsumik ineqartinneqassappat pissusissamisoortutut isiginngilara.Taamattoqartariaqanngilaq, Palle Christiansen oqarpoq.
Peqqissaasut Kattuffianni ilaasortat sivikitsuinnarmik atorfeqartut taartaasullu ingerlatsinermut tapimik ineqarnermullu akiliummik akiliiuaannarsimapput.
Kisianni Sivso Dorph-ip aalajangiusimavaa ilaasortani akiliisassanngitsut.
- Uagut isumaqarpugut, atorfinitsinneqartut, inissamik ingerlaannaartumik tunineqartariaqartut. Uanga isumaqarpunga, utaqqiissaasumik ineqartitsinermi aningaasartuutit taamatut qaffasitsigippata, aaqqissuussineq qiviarneqartariaqartoq.
- Illoqarfimmut pigaanni ini piareeqqaneq ajorpoq. Taamaattumik siusinnerusukkulli ataavartumik ingisassamik pissarsisoqartinnagu utaqqiisaasumik ineqartitsisoqartarpoq. Sivso Dorph oqarpoq.
Kisianni ilaatigut ukiup affaani, ukiumi ilivitsumi allaallu ukiup aappaani affarmi utaqqiisaasumik ineqartoqartarpoq, taamaattorli akiliisoqarani. Tamanna pissusissamisoorpa?
- Oqareernittut akissut ataasiinnaq akissutaasinnaanngilaq. Inissianik amigaateqarnerup taanna pilersinnikuuaa, Sivso Dorph, taama akivoq.
Taanna sulisut kattuffiisa utaqqiisaasumik ineqarnermi akiliuteqartalersinnaanermut tunngasumik isumaqatigiinniarnernut maanna ingerlasunut oqaaseqartartoraat.
Tassalu Sivso Dorph isumaqarpoq, utaqqiisaasumik ineqartitsisarnermut aningaasartuutit appartinniaraanni, pisortat amerlanerusunik inissialiortariaqartut.
Palle Christiansenip aamma nassuerutigaa, taama inissaaleqisoqartigitillugu ajornartorsiut qaangeruminaatsoq.
- Nuummi inissianik nalinginnaasunik, taamatullu aamma sulisut inissaannik, sivisoorsuarmik sanaartortoqarsimanngilaq. Ajornartorsiulli tamanna maanna aaqqinniarsaraarput, oqarpoq.
