Akiliillutik aallaaniartartut pisissimik umimmassinnaatitaalerput
Umimmaat pillugit nalunaarutit maannamut atuuttut Aalisarnermut Pinianermut Nunalerinermullu Naalakkersuisoqarfimmit allanngortinneqarput nutarterneqarlutillu, nalunaarummillu nutaami umimmaat illersugaanerat piniagaanerallu pillugit ataatsimoortinneqarlutik.
Nalunaarummi nutaami akiliuteqarluni aallaaniarneq pillugu maleruagassat juulip 11-anni atuutilersumi sukumiinerusumik allaatigineqarput, pisissimik umimmanniartoqarsinnaanera periarfissaalersoq allassimalluni.
Pisassiissutit, piniarnissamut piffissaliussat, sumilu piniartoqarsinnaanersoq peqqussummi nutaami kapitalimi immikkut ataatsimoortinneqarsimapput. Peqqussummilu ilaatigut erseqqissaassutigineqarpoq piniarnermi assartuussutit umimmannut uumasunut 500 meterinik qaninnerusassanngitsut.
Piniartut inuussutissarsiutigalugu piniarsinnaanermut allagartallit immikkut akuersissuteqarnikkut qamuteralannik, ATV-nik imaluunniit helikopterinik umimmannik ungusinissaminnut aamma periarfissaqalerput.
Peqqussut nutaaq naapertorlugu Piniarnermut Naalakkersuisoq ilaatigut pisinnaatitaalerpoq uminniarfiusartoq aalajangersimasoq kommuninut aqutassanngortissinnaallugu.
