Akiliiffiusartut tamaasa KNI-p taarsernialerpai
KNI Pilersuisup pisiniarfiini 65-ini tamani, KNI Engrosimi kiisalu Polaroilimi standerit atortullu allat akiliiffiusartut (betalingsterminalit) nutaat, juullip tungaanut ikkussuunneqassapput. Taamaasiorneq miliuunilikkaanik aningaasaliinikkut ingerlanneqassaaq, atuisartunut siunissami ingerlanneqartussat qularnaarumallugit kiisalu oqarasuaatit angallattakkat (mobilit) atorlugit akiliisalernissaq allanillu kiffartuussinerit aamma periarfissikkumallugit.
-Atortuutigut teknikkikkut nutaanerpaanngortinneqassapput, taarsersuutigineqartussallu misissuiffigineranni atuisunut atoruminartuunissaat pingaartisssimavarput, taarsersuutigineqartussallu NETS-imiit qaffasinnerpaamik piumasaqaatigineqartunut naapertuutissapput, akileeriaasissani, akiliutitut (kort) atorneqartunut kiisalu paasissutisseeriaatsinut naleqqussakkat. Naatsorsuutigineqarpoq taarsersuineq juullimut niuffannissaq sioqqullugu naammassineqassasoq aammalu oqarasuaatit angallattakkat (mobilit) akiliutitut atulernissaannut pitsanngoriaatissat aamma naammassineqarsimassasut, taamatut oqarpoq KNI-mi IT-qarnermut pisortaq Lars Fausing.