Akilernermi urani aamma oqallisaavoq

Sioorasaarutit ilagaat nakorsat 23-it suliffimminnit tunuarniartut, uranimut inatsit allanngortinneqanngippat.

Akilernermi Baker Lake-mit 85-it kilometerisut kippasitsigisumit uranisiorfeqalersinnaaneranik Areva Resources siunnersuusiorsimavoq. CBC News taama allappoq.

Iqalunni innuttaasunit siunnersuut maanna oqallitsitsigaatsialerpoq. Innutaasunik ataatsimiisitsinermi kingullermi uranimik akerliusut peqatigiiffiat Nunavummiut Makitagunarningit siorasaaripput nunap immikkoortuani Quebec-imi uranisiorfeqalissappat tarnip nappaataanut nakorsaq, Dr. Isabelle Gingras nakorsallu allat 27-it napparsimavimmi Sept-Iles sulisutut tunuarniarlutik.

Australiamiu uranimut akerliusoq, Helen Caldicott oqalugiartuni pingaarnerit ilagivaat. Taassuma uranisiorfeqarnermi peqqissutsimut ulorianarsinnaasut saqqummiuppai.

- Uranisiorfiit peqqissutsimut atugarissaarnermullu navianartorsiortitsipput. Ilinnuinnaanngitsoq illillu kinguaannuinnaanngitsoq nunarsuarmulli tamarmut, Caldicott oqarpoq.

Saskatchewan-ip avannaani, pingasunik uranisiorfilimmi, Canada-p sinneranut sanilliullugu kræftertut tamaani amerlanerunerannik naartuulluunniit ajoquserneruneranik takussutissaqartoqanngilaq.