Akileraarutitigut isertitat qasserpiaanerat paasiniarneqassaaq
Naalakkersuisut kukkunersiusoqatigiiffimmit Deloittemit qernertumik krydsinnapput, kukkunersiuisut oqaaseqaataannik taaneqartartumik. Tamatumani Nunatta Karsiata akileraarutitigut isertitanit qasserpianik pissarsisimaneranik apeqqut ajornartorsiutaammat.
- Akileraarutitigut isertitat ilaat piffissami naatsorsuutigineqartumi takkunneq ajorput, taakkua ilaanni ima kingusinaartigisarput akiliisitsiniartartunit tiguneqartarlutik, piffissamilu tamatumani ajunaarutitut nalikillilerneqartarlutik, kingornalu isertitatut, taamaalillutillu kisitsisit qasserpiaanerat nalornissutigineqalersarluni, aningaasaqarnermut naalakkersuisoq Palle Christiansen oqarpoq.
Ajornartorsiut nakkutiginiarlugu Palle Christiansenip maanna suleqatigiissitaq pilersippaa, taamaalilluni siunissami karakterit allattaaviini nalunaarsuisoqarnissaa pinngitsoortinneqassammat.
- Suleqatigiisitap Deloitte suleqatigalugu qanoq suleriaaseqarnissaq paasiniassavaa, tassami kukkunersiuisut oqaaseqaataat tullissaanik piumannginnatsigu, Palle Christiansen oqarpoq.
Maannakkut sooq tamakkua nakkutigineqanngillat?
- Sulisuma tamakkorpiaat aaqqinniarlugit ilungersorlutik sulipput, naatsorsuutigaarpullu ukiup tulliani kukkunersiuisut oqaaseqaateqassanngitsut, Palle Christiansen naggasiivoq.
