Akileraarutit qaffanneqassanngillat
Nunatta karsiata amigartoorujussuarnera imaannaanngilaq.
Sinneqartoortoqassappalli aningaasaqarnikkut sukaterisoqartariaqarpoq tamannamita qanoq paasissavarput?
- Aningaasaqarnikkut sukaterineq tassaavoq:
Siullertut: Aningaasat isertitat qaangernagit atuineq.
Taamaanngippat aningaasat nunguaannalissapput, tassa pingaarnerpaaq.
Aappaattut: Aningaasaativut sumununa atorivut? Assersuutigalugu suliffeqarfinnut namminersortunngorsaanani tapiiuarneq, tapigarlu imminut akilersinnaanngitsoq, aningaasanik igalaakkut eqqaanerussaaq.
Palle Christiansen oqarpoq.
Aningaasaqarnikkut sukaterineq inuiaqatigiit akileraartarnerannut eqquissanngilaq.
- Pisinnaanera tamaat akileraarutit qaffannginnissaat sulissutigissavara.
Inuit suliumasut pillarneqartariaqanngimmata.
Illuatungaatigullu aamma aperisariaqarpoq, naalagaaffik innuttaminik sutigut tamatigut isumaginneqqissaartoq inuuffigerusupparput? Soorlu Danmarkitulli? Taamaappat akileraariaasiat qiviarniartigu, qallunaat 50 procent sinnerlugu akileraartarput uagullu 42 procenteertarluta tassani nikinganeq ersarissereerpoq.
Palle Christiansen oqarpoq.
Naalakkersuisut 2010-mut aningaasaqarnermut inatsisissamut sukaterillutik aallartereerput.
- Sukaterinerit pineqartut saniatigut atukkersimasatta naafferartumik akilersuinissaat aaqqissuuppavut. Tamarmillu pilersaarutaasutut ingerlassappata sinneqartuulaarnissarput naatsorsuutigaarput.
Soorunami tamanna aatsaat piviusunngorsinnaavoq ingerlatsinikkut aningaasanik atuivallaartoortoqarsimanngippat.
Palle Christiansen oqarpoq.
Inuiaqatigiit immikkut sipaarniarfigineqassanngillat.
- Inuiaqatigiit sullinneqarnerat ajorseriaateqassanngilluinnarpoq.
2011-milu inatsisissaq suliarinialerutsigu aamma sipaarfissanik ujaaseqqissaagut.
Anguniagarpullu sinneqartuulaarnissaq, killormut amigartoornermik kinguneqassagaluarpat amigartoorutit arlaatigut aasariaqarumaarpavut, imaassinnaavoq ingerlatsinermut aningaasartuutitigut sipaaruteqartugut imaluunniit arlaatigut akitsuinermik kinguneqarumaartoq.
Palle Christiansen oqarpoq.
