Nunatsinni piitsut piitsunngoriartuinnassanngippata pisuullu pisuunngoriartuinnassanngippata akileraartarneq aaqqiivigineqarsinnaagaluarpoq.
2007-mi politikkikkut aningaasarsiornikkullu nalunaarutip Inatsisartuni ullumi oqaluuserineqarnerani, tamanna periarfissaasinnaasoq, partiit ilaannit oqaatigineqarpoq.
Siumut oqaaseqartitaa Lars-Emil Johansen oqarpoq akileraarutinik qaffaanissaq Siumumit orniginartinneqanngitsoq.
- Akissaatikinnerpaat akissaatiginnerpaallu assigiinngissutaat annikillisinneqarsinnaavoq akissaatiginnerpaat akileraarutaasa qaffaavigineqarnerisigut, taava utoqqalinersiallit atugaannik pitsanngorsaanermut atorneqarsinnaasunik Nunatta Karsiata isertitai amerlanerulissangaluarput tamannalu Inatsisartunut nalilersoqquarput, Lars-Emil Johansen ilaatigut taama oqarpoq.
Lars-Emil Johansen Aningaasanut Naalakkersuisup Josef Motzfeldtip isumaqatigaa oqarluni; tamanna Inuit Ataqatigiit kissaatigisatoqarigaat, partiillu allat isummamut tassunga isumaqataalissangaluarpata nuannaarutigissanerarlugu.