Akileraarutit Danmarkimi kommunit assortuussutigaat
Allerødip kommuneani borgmesteri isumaqarpoq kommunit qaffaasut tillinnianut assersuuttariaqartut.
Aappaagumut akileraarutissat qaffaataasa sisamararterutaannai kommunit pissavaat, naalagaaffiup sinneri pissallugit, tassa kommunit pingasut naalagaaffimmut isumaqatigiissutaata qitia.
Kommunit pingasut, Norddjurs, Struer aamma Tårnby, naalagaaffimmut akileraarutit qaffannissaannik isumaqatigiissuteqarnerminni Danmarkimi kommunit allat kamaammersippaat, taakkumi isumaqarput, kommunit pineqartut amigartoorutigilerumaagassaat kommuninut allanut artukkiissasut.
- Kommunit karsiini amigartoorutaalersussat kommunit sinnerisa, soorlu uagut, matuniartariaqassavagut, tamanna naammaginngilluinnarlugu Allerødimi borgmesteri Erik Lund oqarpoq.
- Allaanngiivippoq nukappiarapiluk tillinnialeruttortoq naammattuuginnarlugu. Naammattooraannilu oqarfigalugu, ajunngilaq, tillitavit sisamararterutai tigummiinnakkit, sinneri ukiuni tulliuttuni tigujumaarpatit.
Allerrød tassaavoq Sjællandip avannaani kommunit pisuut ilaat, kommunilu taanna aappaagu 100 millioni koruuninik sipaaqqusaavoq.
Kommunip naalagaaffimmut isumaqatigiissuteqarsimasup Struerip borgmesteria Niels Viggo Lynghøj isumaqataavallaanngilaq.
- Allerødip kommunea pisuuneroqigami, piitsuunerusunut naligiissitsinerunissamik piumasaqarsinnaavoq. Paasisariaqarpaali uagut Struerip Kommuneani allatut ajornartumik meeqqerivinnik, meeqqat atuarfiinik aamma ulloq unnuarlu paaqqutarinniffinnik qinersiviup kingulliup iluani matooraasariaqarsimagatta. Uagut sipaarniuteqarnikooqaagut, kommuninuku allat aatsaat sipaarniartariaqalersut, Lynghøj erseqqissaavoq.
Danmarkimi kommunit immikkoortitaasutut misiginerat 2001-imi akileraarutit qummut annerpaaffilerneqarmatali aallartippoq. Kommunit aaqqissuussaanerannik misissueqqissaartarfimmi pisortaq Kurt Houlberg isumaqarpoq iliuuseqartoqartariaqalersoq.
- Aaqqiagiinnginnerit pinngitsoorneqarsinnaanngillat, susoqalaartorlu qaartutut ilillutik aallarteqqittarput, aatsaammi taama pisoqalinngilaq. Iliuuseqartoqartariaqalerpoq, Kurt Houlberg DR-imut oqarpoq.
